Shillong, Nailar 02: Ka Political Department jong ka St. Mary’s College kum shi bynta ka jingrakhe ïa ka jingdap 50 snem ka jylla ka la pynlong ïa ka jingpyni nam halor ka phangpdeng, “Meghalaya 50years of statehood” kaba ki la pynlong ha ka 29 tarik u Naitung.
Ha kane ka sngi, ki samla pule jong ka Department ki la shim bynta ban pyni ïa ka jingïaid lynti jong ka Meghalaya naduh ba ka ïoh ïa la ka jong ka jylla. Ym tang katta ki la pyni ruh ïa kiba bun ki jingkylla kiba wan, la ka long ha ka imlang sahlang, ka kolshor, ka saiñ hima sima, ki kam jngohkai pyrthei bad kiwei kiwei.
Kaba kham khring eh napdeng kine, ka dei ka jingpyni nam ïa ki jingjulor kiba shyrkhei ha u jumai bah uba la wan ban syllad ïa ka jylla ha ki spah snem mynshwa. Nalorkata, la pyni ruh ïa kiba bun ki jingnoh synñiang kiba ki Myntri Rangbah bapher bapher jong ka jylla ki noh synñiang ha kine ki 50 snem.
Haba kren ha katei ka jingïalang, ka Principal jong ka College, ka Sister (Dr) Mary Hariet ka la ai ka jingïaroh ïa ki samla pule kumjuh ïa ki nonghikai kiba la jied da katei ka jingpyni nam kaba long kum kawei na ki lad ban ïathuh khana lane ban pyni ïa kiba bun ki jingeh bad ki jingïakhun kiba ka jylla ka mad ha kine ki 50 snem khlem da klet pat ïa ki kam pynroi kiba la ïaid ryngkat ryngkat.
Ha katei ka jingpyni nam la wan ban shim bynta ruh da ki samla pule bad nonghikai ka St. Mary’s Higher Secondary School.
Kane ka long katkum ka kyrwoh ba la phah da ka Kong I. Kharumnuid, HoD Political Science Department, St. Mary’s College.
