Khliehriat, Risaw, 31: Ka Don Bosco College Byndihati, East Jaiñtia Hills District ha ka sngi Thohdieng ka la pynlong ïa ka prokram ba kyrpang hapoh ka Auditorium hall jong ka college ha Byndihati ha kaba la pynlong ïa ka tamasa Cultural Fest kaba dei ka jingpyni ïa ki lariti jong ka jaitbynriew khasi pnar bad ka lariti jong kiwei kiwei ruh kiba dei na ki jaitbynriew bapher bapher.
Nalor ka jingpyni ïa ki riam tynrai, ki jingrwai tynrai bad ki jingshad tynrai, ka la don ruh ka tamasa ha kaba die ïa ki jingbam tynrai lane ka Food Fest, ba la die ha ki stall ba kynthup ka jait jingbam jong ki khasi pnar, ka jait jingbam jong ki nong Mizoram, Tripura, Arunachal, Tripuri bad kiwei kiwei bad baroh kiba don ha kane ka prokram ki la shim ruh ia ki kyntien kular ne ka pledge ban pynlong ia ka East Jaiñtia Hills District kaba lait na u drok.
Ha katei ka cultural prokram, u Dr Sanky Shangpung, uba dei u Chairman jong ka Jaiñtia Hills Autonomous District Council, u la long kum u kongsan bad u ADC ka East Jaiñtia Hills District, u R.Marak kum u symbud kongsan.
Haba kren kum u kongsan, u Dr Sanky Shangpung u la ai ka jingiaroh ïa ka Don Bosco College Byndihati kaba la lah ban pynlong ïa kane ka tamasa kaba wanrah ïa ka jingiatylli, ka jingiaieid lyngba ki jingpyni ïa la ki jong ki jong ki riti, ki dustur bapher bapher, u la ong ba ba kane ka tamasa cultural fest kam dei tang ka jingpynbyrngia hynrei ka dei ruh kum kaba pynneh pynsah ïa ka riti, ka dustur kaba dei ka lariti, ka dei ruh kaba donkam haduh katta katta ban pynneh pynsah ïa ka riti ka dustur.
U la ong ruh ba ha kaba kum kane ka juk Social media, ka pyrthei baroh ka ïoh ban tip ïa ki riti ki dutur jong ki jaitbynriew bapher bapher bad ka social media ka iarap ban ai jingtip bad pynphriang ïa ka khubor sha ka pyrthei baroh kawei bad kaba ban tehsong ïa ki jaitbynriew bad pynlong ruh ban burom iwei ia iwei “To ngin pyndonkam ïa ki kor ki bor jong ka pyrthei degital ha ka rukom kaba bha ban lum jingtip bad ruh ban tip, ban ieid ban burom iwei ia iwei” ong u kongsan bad u kyntu ruh ia ki samla pule jong ka Don Bosco College ba ki dei ban don ka mynsiew ban ieid, ban burom iwei ia iwei bad u ai mynsiem ruh ïa baroh kito kiba shibynta ha kane ka cultural Fest ba kin nang kiwei shaphrang bad ba kim dei ban sheptieng ïa ki jingeh namar ki jingeh, jingbakla ki dei ki maw jam sha ka thong ka jingjop.
U Sumbud kongsan, u R,Marak, u la ong ba ka dei ka jingpynneh pynsah ïa ka riti ka dustur kaba lah ban iarap ban pynneh ruh ïa ka jaitbynriew na kawei ka pateng sha kawei pat ka pateng bad bynrap ba kane ka cultural prokram ka dei ka prokram kaba donkam bha bad dei lyngba kane ka prokram kaba ngi ruh ngi iog ban tip ïa ki riti, ki dustur, ki rukom bam rukom riam tynrai jong ki jaitbynriew bapher bapher kiba im ha kane ka thaiñ shatei lam mihngi ka ri India bad kine ki dei kita ki lariti kiba naduh ki hajar snem mynshwa kiba dang im dang sah haduh mynta.
U R Marak, u la ong ruh ba wat na ka liang ka sorkar ruh ka la buh kyrpang ïa ka tnat treikam ka ban peit bad khmih, ban kyntiew ïa ka riti ka dustur ne ka lariti ka Art and Culture Department ka ban lum jingtip ïa ki jait riti dustir bapher bapher bad ka ban iarap ha kaba pynneh pynsah ïa ki riti ki dustur ba kin neh pateng la pateng namar dei ka riti ka dustur ka ba lah ban pynithuh ïa ngi ba ngi dei na ei ne ba ngi wan na kano ka jaitbynriew.
Kiba la ai jingkren ki kynthup ruh u Principal Don Bosco College Byndihati, u Fr. Daniel. D.M Cajee, ha kane ka prokram la ïa don ryngkat lang ruh u Waheh Shnong Moolamylliang, u bah Apmon Pashiang, ki nonghikai bad ki samla pule jong ka college bad ia ka prokram la pyniaid da ka samla Manisha Saio bad u Budha kiwon Syrti.
Hadien ka Cultural prokram, u kongsan, u Symbud Kongsan lem bad kiwei kiwei ki riew rangbah ki la leit peit leit jngoh ïa ki stall ba die jingbam ba la pynkhreh da ki samla pule kiba na ki jaitbynriew bapher bapher kiba na ka thaiñ satei lam mihngi ba kynthup ka stall jingbam jong ki Khas Pnar, Mizoram, Arunachal, Tripura bad kiwei kiwei.
