Pyni ka FCI Khliehtyrshi ïa ki khynnah skul halor ka rukom lum jingkheiñ ïa u Khaw

Jowai, Jylliew 24 : Ki bor pynïaid jong ka Food Corporation of India (FCI), Food Storage Depot (FSD) Jowai kaba don ha ka shnong Khliehtyrshi West Jaiñtia Hills District kila pynlong ïa ka ‘Showcase’ ne ka jingpyni sha ki khynnah skul halor ka rukom lum jingkheiñ bad ka rukom buh ïa u khaw katkum ka juk ba mynta.
Mynta ka sngi Thohdieng katei ka tnad kala ïoh ka jingpyni bad jingbatai ïa ka rukom treikam bad rukom buh ïa u khaw na u Technical Assistant ka FCI-FSD Jowai u bah Darlet Dkhar. U bah Dkhar ula pyni kumno ka rukom ban thew ïa ki trok kiba la wan kit bad pynhap ïa u khaw ha kane ka jaka bad kumno ki lum ïa ki jingkheiñ thik ba pathik da ki kor Computer bad kumno ruh ki pyllait ne ai ïa u khaw na kane ka FCI kaba peit ïa baroh kawei ka ri Jaiñtia.
Shuh shuh haka jingïadei bad u khaw plastic kiba ki briew ki juh tieng, u bah Darlet ula ïathuh ba une u khaw plastic ba shait ong ki briew, ha ka jingshisha u dei khaw Vitamin uba ka kyrteng jong u ka dei u Fortified Rice, kumta ula kyntu ïa ki khynnah skul ba kin ïathuh lem ïa kane sha kiba haïing hasem jong ki, ba une u khaw plastic u dei u khaw uba ka sorkar ka la ai khang na ka bynta ka jingbha. U la ïathuh ruh ba ha kane ka jaka buh khaw la juh pynpoi kum ïa u khaw PHH, AAY, Tide Over, MDM bad kiwei.
La ïathuh da u bah Darlet kum kane ka program kaba ai ka jingtip sha ki khynnah skul khamtam kiba don hapoh kane ka thaiñ ba don kane ka tnat treikam ka long kaba don kam eh, na ka bynta ka jingtip jong ki kum ki khynnah skul kumjuh ruh ki nongshong shnong hapoh kane ka thaiñ ban tip kumno kane ka tnat ka pynïaid ïa ki kam jong ka.
Ha kane ka sngi la donlang ruh u Depot Incharge ka FCI Jowai u Sanjoy Kumar Das, ki nonghikai bad ki nongtrei jong ka FCI Jowai.