Jowai, Nailur 22: Mynta ka sngi ki bor pynïaid jong ka Food Corporation of India (FCI), Food Storage Depot (FSD) Jowai kaba don ha ka shnong Khliehtyrshi West Jaiñtia Hills District kila pynlong ïa ka ‘Showcase’ ne ka jingpyni ïa ki rukom pynïaid ïa ka kam ka jam jong kane ka tnad treikam katkum ka juk ba mynta.
Kane ka FCI FSD Jowai ka dei kawei na ki jaka buh ïa u khaw uba wan pynpoi na ka sorkar kmie naka bynta ban pyndap pynbiang ïa ka bam ka dih jong ka District hi baroh kawei, ha kane ka sngi u Technical Assistant ka FCI-FSD Jowai u bah Darlet Dkhar la ai ka jingbatia ïa ka rukom lum jingkhieñ jingdiah ïa u khaw naduh ka rukum thew ïa ki kali (trok), ka jingkhia jong u khaw na ka trok bad ka jingbha jong u khaw hashwa ban pynrung hapoh katei ka jaka buh khaw Depot.
Shi bynta ban pyntreikam ïa ka Digital India hapoh ka jaka treikam jong ka FSD-Jowai ula ong baroh ki nongtrei kila don la ka jong ka jong ka kam da ki kor Computer kaba pynsuk ïa ka rukom treikam ïa ki staff ha ki bynta bapher bapher.
Ïa ka FCI la seng ha u snem 1964 da ka Food Cooperation Acts, bad ka jingthmu ba kongsan jong ka FCI ka long ban pynbiang ïa ki marbam kum ïa u khaw ban pynïoh sha ki jaka ne ki shnong bym rep ïa u khaw ha ka dor kaba bit, kaba la buh ruh ïa ka thong baroh ki briew jong ka ri kin ïoh ïa ka bam lyngba ka Food Distribution System.
Kumba long mynta ka na ka liang ka FCI ka la pynthymmai ïa ka rukom trei kam ka jong ka katkum ka juk ba mynta, kum ha kaba buh ïa ki sign ne ki jingkdew, ki tiar ban ïada na ka jingpluh ding bad kiwei na ka bynta ban pynsuk ïa ki briew kiba nabar bad ïa ki nongtrei, kumjuh ka jingkyntiew ïa ka jingkhuid jingsuba ha ki Godown bad ki kor ki bor katkum ka juk ba mynta.
