Pyni jingdom u EM Development ïa u MDC Sohra ba kylli bunsien ïa ka skhim MDC

Shillong, Risaw 23: U EM ba khmih ïa ka tnat Development ka Council u Bah Powell Sohkhlet u la pynpaw ïa ka jingdom ïa u Nongïalam ka liang pyrshah u Bah T W Chyne hadien ba une u MDC u la ïai kylli bunsien ïa ka jingbym pat pynlait ïa ki skhim jong ka 15th Finance Commission u snem 21-22 da kaba pynpaw ruh ba mynta ki la paw ba ki dei ki riew thok namarba ki skhim ba la dep ban aiti bad kular ruh sha ki paidbah ym pat lah ban ïoh haduh mynta.
U MDC ka Sohra u la pynpaw ruh ka jingsngew lyngngoh ba mynta ka EC ka la iaid la 8 bnai hynrei ki skhim na ka 15th Finance Commission ym pat ioh bad dei halor ba u EM u la dep ban jubab bad pynshai la bunsien kaba la pynlong ruh ïa u ban pynpaw ka jingdom bad ong ruh ba kane ka EC kaba dang shimti dang ha une u snem 2025 ka la pyrshang ban pyndep ïa kine ki jingeh, hynrei kane ka 15th Finance Commission ka dei kaba naduh ka snem 21-22 bad ka la ïaid la bun snem, kaei pat ba ki EC barim ki la leh?.
Nadaw jong kane ka jingbym pat ïoh ïa ki skhim, mynta ka Khasi Hills Autonomous District Council (KHADC) ka la mad ïa ka jingeh na ka daw ka jingslem ban ïoh pdiang ïa ka 2nd installment jong ka Tied bad Untied Grants u snem 2021-22, bad u Executive Member (EM) ka Tnad Development u Bah Powell Sohkhlet ula pynpaw ba ka Council kam lah ban ai kano kano ka jingkular lano ba kan ïoh pdiang ïa ka pisa.
Haba jubab ïa ka jingkylli ba la wanrah da ka MDC ka NPP Kong Grace Mary Kharpuri ha ka sngi Palei, u Bah Powell ula batai ba ka Council ka la trei shitom ban pyntreikam ïa ki kyndon ka 15th Finance Commission kynthup ka jingpynrung ïa ki scheme ha ka 2-portal, ban siew online, bad pyndep ïa ka online auditing ïa ki account jong u snem 2020-21. Hynrei, ka Council ka la mad ïa shibun ki jingeh haba ïadei bad ka jingtreikam bad bad ka portal ha kaba kane ka la pynsuki ïa ka kam.
Halor kane ka MDC na Nongshken ka la pynpaw ïa ka jingbym sngewtynnad bad jingbitar, da kaba ong ba ka jingslem ka la buh ïa kiba bun ki MDC ha ka jingeh bad kyrpad ïa ka EC ba kan pynsted noh ïa ki kam khnang ban pynthikna ïa ka jingpyllait noh mardor ïa ka 2nd installment.
Ka MDC ka la pynpaw ruh ïa ka jingsngewkhia halor ka jingbym lah jong ka Council ban pyllait ïa ka song pisa ba donkam bad ban siew ïa ki bill jong ki kam ba la dep pyntrei, haba buh jingkylli balei ba bthah ïa ki contractor ba kin wan sha Shillong bunsien.
Haba ïashim bynta lang, u Nongïalam ka Liang Pyrshah u Bah Titosstarwell Chyne ula buh jingkylli ïa ki daw ha lyndet ka jingslem bad u Bah Powell ula jubab ba ka Council kan hap ban pyntreikam ïa baroh ki kyndon treikam ba la buh katkum ki kyndon jong ka Finance Commission, kynthup ka online auditing, kaba dei ka jingeh kaba khraw ïa ki Ophisar jong ka Council.
U MDC ka Sohra ula pynpaw ruh ka jingsngewkhia halor ka jingkut noh jong ka 15th Finance Commission bad kylli la ka Council kan dang ïoh ne em ïa ka 2nd installment jong ka Tied bad Untied grants, namar mynta la sdang treikam sa ka 16th Finance Commission.
U la ong, “Bun ki MDC ki la kyntu ïa ki nongïoh skhim, kynthup ki ïingmane, ki skul, ba kin phah ïa ki jingtyrwa da ka jingkular ba kin pynïoh skhim, bad mynta namar kane, ka la pyni ïa ki MDC kum ki nongshukor bad kiba thok.”
Haba jubab ïa kane, u Bah Powell ula ïathuh ba ki skhim hapoh ka 15th Finance Commission ki dei na ka bynta u snem 2021-2022 bad ka EC ba ïalam ka VPP ka dang shimti ha u 2025 bad ka jingslem ka dei namar ba ka Council ka treikam offline ha ka jaka ban leh online bad kumta u la pynpaw ïa ka jingkyrmen ba mynta ka jingsdang ban phah ïa ki skhim lyngba ka E-Gram Swaraj ka la sdang ban ïaid, kumta shisien ba ka kam ka la ïaid bha khlem ïa ki skhim ruh ynsa ïoh.