Pyni ïa ka Roadmap jongphi na bynta ki paidbah ha ka jaka ban kynthoh pyrshah sorkar : Rakkam ïa ki Seng Saiñ Pyrthei

Shillong, K’lyngkot 09 : U Myntri ka Tnad Pule Puthi Rakkam A Sangma ha ka sngi Palei, ula ban jur ïa ka jingdonkam ba ki Seng Saiñ Pyrthei (Political Party) ba kin pyni ne ai ïa la ki jong ki ‘roadmap’ (ki kam ba ki don jingthmu ban leh) na ka bynta ka Jylla bad ki paidbah ha ka jaka ban shu kynthoh bad pynrem ïa ka Sorkar.
Kane ka jingkynthoh kala mih kum ka jubab ïa ki jingkynthoh ba dang shen jong ka Voice of the People Party (VPP) haba ïadei bad ki kot skul.
U Rakkam ula ong ba um don jingtip satia ïa kaei kaba ka VPP ka thmu ban ong namar ka jingkynthoh jong ka, kam long satia kaba shai.
“Ka mat ka long ba u (Nongïalam ka VPP) ki lah ban kren na ka bynta ki katto katne ki businessman ban kham ithuh namar ngam sngewthuh satia ïa ki mat ba ki kren halor ki kot skul, ngi la bujli ïa ki kot MBoSE sha ka NCERT. Kim dei ban pyrshah ïa kane namar ngam shym la ïoh pdiang ïa ka jingpyrshah nangno nangno ruh, ki nonghikai, ki stad ki jhad lane ki samla pule” ula bynrap.
Haba kylli, u Myntri ka tnad pule puthi ula kubur ba ka VPP kala pynmih ishu ïa ki kot skul namar ka elekshon MDC ban wan.
“Kum u Nongïalam seng saiñ pyrthei bad riew shimet, nga sngew ba ha ka jaka ban kynthoh ïano ïano, ki (VPP) dei ban ai ïa la ka jong ka’roadmap’, ki jingai jingmut na ka bynta ka Jylla bad ki paidbah khamtam ha ka por elekshon ban shu kynnoh ïano ïano kan nym khring satia ïa ki nongthep vote ne ïano ïano ruh. Nga sngew ba ka long kongsan ba ki seng saiñ pyrthei kin ai ïala ki roadmap-kaei kaba ki kwah ban leh na ka bynta ka Jylla bad kaei kaba ki kwah ban leh na ka bynta ki paidbah, kaei kaba ki kwah ban leh ha ka kam pule dangle lane kino kino ki kam khnang ba ki paidbah kin tip” ong u Rakkam.