Pyni bormet ki rang bad ki thei ha ka State Powerlifting Championship ha Umsning, Ri Bhoi District

Nongpoh, Ïaiong 05: Ka Meghalaya Power Lifting & Fitness Association hynnin ka sngi ka la pynlong ïa ka jingïakop rah nar kaba la tip kum ka Meghalaya State Powerlifting Championships ha Umsning Auditorium Hall, ha kaba ki rang bad ki thei na kylleng ka jylla ki la wan ban ïashimbynta.
Ha kane ka rynsan jing-ïakop, ki nongïalehkai ki la ïakhun ha ki bynta bapher bapher kiba kynthup ïa ka Bench Press, Squat bad Deadlift, da kaba pyni ïa ka jingkhlaiñ ka bor met bad ka jingtbit jong ki.
Ïakane ka prokram la wan ban sakhilang da u Sahep Pulit jong ka Umsning PS u K. Islam, ryngkat bad u Chairman ka Umsning Town Dorbar u Bah Rocky Kylla, u President ka Association u Bah Riki Diengdoh bad u Secretary u Bah Franky Nongrum, lem bad kiwei pat ki dkhot.
Ka Meghalaya Power Lifting & Fitness Association ka dei ka kynhun kaba trei shitom ban kyntiew ïakane ka jingïalehkai ha jylla da kaba pynlong ïakum kine ki lym-pung ha ki bynta bapher bapher, khnang ban ai lad ïa ki samla kynthei bad shyn-rang kiba don sap ha kane ka jait jingïalehkai ban sei madan ïa ka jingtbit jong ki.
Ha kaba kut jong ka jingïakop, la sam ruh ïa ki khusnam ryngkat ki syrnot sha ki nongjop kum ka jingai mynsiem bad jingïaroh ïa ka jingïakhun jong ki ha kane ka lympung.