Jowai, Naitung 17: Ka All Jaiñtia Muster Roll Workers & Labour Union (AJMRW&LU) mynta ka sngi palei haka ‘General Meeting’ bala pynlong ha District Library Auditorium Mynthong Jowai, kala pynsngew ba ka sorkar kala pynhiran palat ïa ka pla tyngka jong ka ban siew dep ïa kaba bainong jong ki katkum ka Minimum Wages Act.
Ha kane ka jingïalang, ki nongtrei Muster Roll kila shim ïa ka rai ban dawa na ka sorkar ban pynlait ïaka Arrears kaba dei hok ban siew shisien san (5) snem bad ka Variable Dearness Allowance (VDA) ban pynkiew ïa ka bainong manla ka 1 tarik u April bad 1 tarik u October.
Halor kine ki ar tylli ki mat jingdawa na ka liang ka AJMRW&LU kala dep ban pynsngew manla ka por sha ka sorkar jylla ban pynlait ïa ka pisa ba dang sah, wat haduh bala pynlong da ka jingïakhih ha Nongbah Shillong ha u snem 2024.
Ka AJMRW&LU mynta ka sngi kala shim ïa ka rai ban leit pynkynmaw biang ïaka sorkar ba kan pyllait noh ïa kane ka pisa (Arrear) kaba dang sah sa 15 bnai naduh u 1 October 2023.
Ha kaba ïadei bad ka VDA ban pynkiew ïa ka bainong ar sien shisnem katkum ka Minimum Wages Act, hynrei ka sorkar haduh mynta kam shem la ai jingthoh ban pynkiew ïa kane ka bai nong bad kane kala pynsngewsih ïa ka nongtrei Muster Roll.
La kyrpad ïa u Myntri Rangbah ba peit ïa ka pla tyngka bad ïa u Commissioner Secretary ka Jylla ba kin pynllait noh ïa ka VDA kaba dei ka hok ïa ki ban ïoh.
U President ka seng ma Khroo L. Pariat ula kren shai sha ka sorkar ‘lada ym don ki Muster Roll mano ban peit ïa ki kam pynkhuid, ki kam rah file, ki kam plie um bad kiwei de’, kumta ka sorkar kam dei ban ap ïa ki haduh ban da mih surok haka dur ka jingïakhih.
