Shillong, Nailur 13: Ka HYC Sengkmie ka la phah ka shithi sha Surgeon Superintendent (S.S) Civil Hospital Shillong, Meghalaya halor ka phang ba ïadei bad ki jingeh ba la pynkylla ïa ki jingbuh por ban pyndep ïa ki jingpuid ïa ki nongpang ha kane ka jaka sumar.
Na ka liang ka seng Hynñiewtrep Youths’ Council (HYC)-Central Executive Council (CEC), ka la ong ba ka jingpynlong jong ka seng ban pynpaw ïa ka jingbym sngewhun halor kane ka jingpynkylla ïa ka por ban puid ïa ki nongpang bad ka jingpynkynriah ïa ki por ban pyndep ka jingsumar kiba don ha Civil Hospital, Shillong. “Kan long kaba bha ban pyntip sha ngi haba ïadei ki jingbuh ïa ki sngi ban puid ïa ki nongpang bad ba ym dei ban wanrah ki jingkylla ïa ka por syndet syndet, naba kane ka wanrah ka jingeh ïa ki nongpang bad ki longïing kiba wad ki lad jingsumar ha kane ka Hospital,” ong u President ka HYC u Bah Roy Kupar Synrem ha ka kyrwoh khubor.
U la ong ruh ba kane ka jingpynkylla kaba syndet ïa ka por ka ktah bha ïa ki nongpang bad ki la ap na ka bynta ba kin ïoh ïa ki jingshah puid ha ki por ba la buh kumta dei ban don ka jingpynbeit bad ki jingpynbha halor kane ka jingduna. “Ka jingduna pisa bad ka jingshah ktah ha ka jingmut jingpyrkhat ka pynlong ïa ki nongpang ban ym thikna haba ïadei bad ka jingai jingsumar,” u la ong.
“Halor kane ngi kyrpad ïa phi ban tohkit ïa kane ka jingjia kham kloi katba lah bad ban shim ki sienjam ban pyntreikam ïa ki por ba la buh kyrpang khnang ba kan ym ktah ïa kiba pang bad ym ban shu pynkylla ïa ka por ha ka minit kaba khatduh,” pynkut ka kyrwoh na u Bah Roy Kupar Synrem, President Hynñiewtrep Youths’ Council (HYC), Central Executive Council (CEC).
