Shillong, Naitung 11 : Ka Sur ki Nong Mawlai kaba kynthup ïa ka KSU, FKJGP bad HNYF Mawlai Circle hynne ka sngi ka 11tarik Naitung 2022 ka la leit pynpoi da ka shithi ban kyntu ïa baroh ki Seng Saiñ Pyrthei kynthup ïa kito kiba don ha ka liang Synshar ruh ha ka Liang Pyrshah bad kumjuh ruh sha ki seng saiñ pyrthei ban ïakren lang halor ka jingpynslem ban sei pyrthei ïa ka kaiphod shah siat ïap u Bah Cheristerfield Thangkhiew ba dei ruh u nongïalam ba rim ka HNLC.
Na ka liang Ka Sur Ki Nong Mawlai ka la dawa ba ki seng saiñ pyrthei ba ki dei ban kren eiei bad ban dawa mardor na ka Sorkar ba ka dei ban sei bad pynpaw paidbah noh ïa kaei kaba mih na ka jingtohkit ba laitluid ba la khlieh tang da uwei u briew kata u Justice T.Vaiphei.
Katkum ka kyrwoh la kynnoh ba ka jingsngap jar jar jong ka Sorkar ka pyn suba sniew ïa ki Sengbhalang namar kat haduh mynta lajan ar bnai naduh ba la phah sha ka Sorkar da utei u Nongbishar ïa kaei kaba u shem bad lap na kata ka jing tohkit laitluid jong u, pynban na ka liang ka Sorkar ka sngap man man.
“Kane ka pyni shai ba ka la bakla halor katei ka kam, kumta ki la pyrshang ban buhrieh ïa kito kiba donkti ban aibor ïa ki pulit ban siat ïap ïa utei u Rangbah Nongïalam barim jong ka HNLC. Ko Sorkar phi la pan por 6 bnai kat haduh ban da dep ka jing tohkit da kaba kyntu bad kyrpad ïangi ban pyn sngewthuh ïaki paidbah ba kin long jai jai, ngi la leh ïa kata bad ngi la burom ïaka jing kyrpad jong phi, to burom lang ïangi mynta da kaba phin pynbna paidbah ïa ka kaiphod kaba mih naka jing tohkit,” ong ka kyrwoh.
Shuh shuh la ong ruh ba na ka liang jong ki kum ka kynhun ki dawa na ka sorkar ba kan bat la ka kular kumba kala khlei ha shwa ban thung ïa katei ka kynhun tohkit. Ka kyrwoh ka ong ruh ba lada na ka liang ka Sorkar kam sngap, kum ka kynhun Ka Sur Ki Nong Mawlai kin ym sngap jar satia.
