Nongstoiñ, Jylliew 11: Ka Hynñiewtrep Youths Council HYC Nongstoiñ Circle ha ka sngi balang la pynphai noh ïa ki lai tylli ki trok na Assam kiba wan kit Dieng (Saplings) na Assam ban thung ha ki jaka bapher bapher ka West Khasi Hills District lyngba ka Regeneration Meghalaya Project.
U President ka HYC West Khasi Hills District u bah Lumlang Kharsyiemlieh, u la ong ba ka jingpynphai ïa ki trok ka dei halor ki nongrim ba kine ki trok kim biang ki kot sla kum ki Trading license na KHADC, NOC na ka tnad Forest, ym don Challan ne Invoice. Kim don ka Certificate ban test la ki don jingpang ne em haba ki wanrah na shabar da ka sorkar jylla. Hato hap don jingmynjur lang ne em na ki trai jaka shwa ban wanrah.
Kawei ka mat kum ka seng ka kwah ba ka dei ka project ha Meghalaya balei ka pynmyntoi ïa ki kiwei ki State. Lada ki kwah kan myntoi ïa ka jylla Assam ne kiwei la bha ban rah noh sha Assam ne kiwei ki Jylla.
Ka seng hadien ka jingïathuh ki trai jaka kiba shah thung, ba lada thung ïa ki dieng ba wanrah na Assam ki bun ba ïap bad lada thung ki dieng (Saplings) na trai jylla ki bha ki san ong ki trai jaka.
“Ka seng kan ym ai lad hapoh west Khasi Hills District bad ka Jylla, ban wanrah dieng na shabar. Ngi kwah kane ka project kan wanrah ïa ki jingmyntoi ha ka Jylla baroh kawei ban kyntiew ïa ki briew jong ngi ym ïa kiwei ki Jylla” ong u President. U la ong ruh, “Lada kata ka Regeneration Meghalaya Project kan pynmyntoi ïa ki briew na Assam to rah noh sha Assam bad pynkylla noh ka Regeneration Assam Project keiñ”, bad bynrap, “Ngi kyrpad ïa ka KHADC na Forest bad ka Sorkar Jylla, ban kyrshan lem ba kino kino ki project kiba wan sha ka jylla, ki dei ban pynim ne pynïoh nong ïa ka Jylla bad ïa ka Jaitbynriew jong ngi ha baroh ki liang”.
