Nongpoh, Jymmang 07: Ka Ri Bhoi Students Union Sengkmie hynnin ka sngi kata haka 6 tarik u Jymmang 2022 ka la lah ban pynhap pyrda noh ïaka ;1st Eastern Ri Bhoi Inter School’s Sports Meet 2022’ ïa kaba la sdang naduh ka 4 tarik bad la pynkut pat ha ka 6 tarik u May 2022 ha kaba haduh 15 tylli ki skul ki la wan ban ïa shimbynta ha kane ka School’s sport Meet kiba dei ki skul na ka thain Ri Bhoi Mihngi.
Ka seng hap;oh ka jingïalam jong u Samla Everjoy Nongpluh kum u President bad u samla Amberlight Masharing, Working President haka jingïashimbynta byntalang jong ki Dkhot ki la lah ban pynkut noh ïa kane ka jingpynïalehkai ïaki khynnah skul kane ka thain hapdeng ka prokram kaba phuh ba phieng bad ruh ba la lah ban sam ïa ki khusnam bapher bapher na ka bynta ki skul kiba la khur ïa ka jingjop ha kane ka lympung ïalehkai sport ba lai sngi kyntih ha Madan Kurakalang, Bhoirymbong ha Ri Bhoi.
Ki nongshah khot sngewbha haba ai jingkren ha kane kasnig ki la pynpaw ïaka jingsngew kmen ba ki samla rangbah ka thain ki don ïa kiba kum ine ki jingmut ban kyntiew ïaki kam ïalehkai na ka bynta ki khynnah skul kaba la long ruh hadien2 snem jong ka jingïashong ing namar ka khangdam halor ka pang covid 19. Hynrei dei ha kane ka snem ba ka jinglong jingman ka pyrthei ka la ailad biang pat ïaki khynnah skul ban bteng ban leit sha ki jaka pule bad ruh ban ïalum lang na ka bynta ki kam ïalehkai bad kiwei kiwei.
Ha kaba janmiet jong ka sngi u Bah Banteidor Lyngdoh uba dei u Myntri ki kam ïalehkai sport jong ka sorkar jylla u la wan ban sakhi ïa kane ka Sports Meet kum u kongsan haka jingïadonlang jong u Bah Ngaitlang Dhar uba dei u MLA barim jong ka Umroi Constituency, u Bah Samborlang Diengdoh uba dei u Vice President barim jong ka Seng RBSU, ki nongïalam jong ka seng RBSU, ki rangbah jong ka thain, ki nonghikai skul, ki paidbah kiba na kylleng kiba la wan ban sakhilang ïa kane ka sports meet jong ki khynnah skul ka thain.
Ka Kyrdem Presbyterian Secondary School ka la long ka lahduh haka Mass Drill na ka liang jong ki Senior, bad ka Bethany Secondary School pat napdeng ki Junior. Haka March Pass pat haka kyrdan ki junior ka Plielad Secondary School ka la long ka lahduh bad ka Kyrdem Presbyterian Secondary School haka kyrdan jong ki Senior kum ka lahduh. Ïaka best Discipline la iohrah da ka Modern English School Lumsohpieng.
