Shillong, Nohprah 10: U Conrad K Sangma uba dei u Myntri Rangbha ka jylla ha ryngkat bad u Bah Lambor Malngiang uba dei u MLA/MDC barim ka Nongkrem Constituency, kila pynhap pyrda noh ia ka jingrakhe dap 75 snem jong ka Umphyrnai Presbyterian Secondary School, LP Section ia kaba la seng naduh u snem 1950.
La sdang ia kane ka skul kum ka skul Lower Primary kaba la seng da ki missionary hapoh ka Balang Presbyterian Umphyrnai bad ha ka jingiaid lynti la pynkiew kyrdan noh ïa kane ka skul sha ka kyrdan Upper Primary ha u snem 1995 bad sha ka kyrdan Secondary ha u snem 2005, da kaba ioh jingbit ban pynïaid ïa ka Secondary section ha u snem 2010, bud sa ka jingpynïasoh pura hapoh ka MBOSE ha u snem 2015.
Haba kren ha ka jingialang, u Conrad K Sangma u la ong, Ka pule puthi kadei ka thong kaba ha khmat eh jong ka sorkar naduh ba kala ioh ban synshar ha u snem 2018 bad hadien la nang ban pynbha shuh shuh ia ki skul sorkar naduh ki kyrdan LP, UP bad kumjuh ruh ia ki Secondary School bad ki Higher Secondary School.
Ha kaba iadei bad ka history jong kane ka skul, u Conrad K Sangma u la ai ka jingiaroh ia ki jingtrei shitom bad ka jingtrei minot jong ki nongpyniaid jong kane ka skul kynthup naduh ka managing committee ha kine ki phew snem kiba la leit noh.
U Conrad u la pynpaw ruh ia ka jingsngewnguh ia ka jingiadon bynta jong ka principal naduh u snem 1978 ba ka wan ban shong skul ha kane ka jaka pule tad haduh mynta ba kala kylla long ka principal bad kane kadei ka khubor ba ai mynsiem shisha ia ngi baroh lang.
Kum ka jingkyrshan ia ka skul u Conrad u la pynbna ba un ai 20 lak na ka Chief Minister’s Special Development Fund na ka bynta ban shna pynheh ïa ka ïing skul bad kumjuh ruh ki tiar tem tiar put na ka bynta ki khynnah skul.
Na ka liang u Symbud Kongsan u Bah Lambor Malngiang haba kren ha ka jingialang u la iaroh ia ka jinglah jong kane ka skul ba ha ki khyndai snem lynter ka jingpass bha jong ki khynnah na kane ka skul ka long beit 100 percent
Ha kane ka sngi la ia don lang ruh u Pastor C Lamare, u Bah L Kharkongor uba dei u Rangbah Shnong, u Bah Anthony Lyngdoh u BDO ka Mawryngkneng ki nonghikai skul bad ki kmie ki kpa jong ki khynnah skul nalor kiwei pat.
