Shillong, Rymphang 09 : U Nongai buit jong u Myntri Rangbah ka Jylla, Bah Hamletson Dohling ha ka sngi Saitjain u la pynhap pyrda noh ïa ka jingrakhe ïa ka Youth Week ba la pynlong da ka Seng Samla Lawsohtun ha ka jingïadon lang u Bah H Rynjah Rangbah Shnong, Bah Mitchel Wankhar ex-MDC, ki nongïalam ka Seng Longkmie Lawsohtun, KSU,VDP bad ki nongïalam ka Lawsohtun Sports Club.
Ha kane ka lympung la pynshongkun da ka jingïakob thei bad rang bhabriew lane Lukhimai 2026 bad Nai Khatsaw Synñia 2026.
Ïa ka nam lahduh ha ka jingïakob thei bhabriew lane Lukhimai 2026 la ïoh da i samla Cassandra R Pasi katba ha ka liang ki shynrang ne Nai Khatsaw Synñia la ïoh da u samla Banrikupar Kharsohtun.
Nangta ïa ka kyrdan kaba ar bad ba lai ha ka liang ka Lukhimai 2026 la ïoh da i Agnes Buam bad Ibashisha Shabong. Katba ha ka liang ki samla shynrang ïa ka nam ba ar bad ba lai ha ka Nai Khatsaw Synñia la ïoh da u samla Bendrick Rynjah bad Nangsan Warjri.
Na ka liang u Kongsan haba kren ha ka jingïalang u la ai ka jingïaroh ïa ki nongpynïaid kiba la pynlong ïa katei ka lympung kaba long ka lad ïa ki khun samla bad ki nongshong shnong ba kin pyni ïa ka sap bad ka jingtbit jong ki ha ka jingïakob ban pyni ïa ka riam Khasi.
U la ai ruh ka jingïaroh ïa baroh ki nongshim bynta kiba la mih shakhmat ban pynshongshit ïa kane ka lympung bad khamtam eh ïa ki nongjop kiba la pynleit jingmut bad ai ïa kaba bha tam ban pynphuh ïa kane ka prokram.
