Shillong, Kyllalyngkot 04: Ka Seng Samla Mawlai Phudmuri (SSMP) ka la pynhap pyrda noh ïaka ka (L) Daniel R. Kurbah Memorial Phudmuri Interdong Basketball Tournament 2025 haka 31 tarik u Nohprah, 2025 ha Madan Basketball ka Sacred Heart Theological College, ha Mawlai Phudmuri.
Ha kane ka Sngi ka Kong Rosy M. Warjri kaba dei ka Kurim, jong I Late Daniel R. Kurbah, ka la long kum ka Kongsan ha ka jingsakhi lang da u Rangbah Shnong ka Phudmuri u Bah Skim Singh Khongkliam, ki Dkhot ka Excecutive Committee Dorbar Shnong bad ki Nongïalam Seng Longkmie.
Ha kane ka sngi la ïoh ban pynsngew ïaka khana lyngkot shaphang ka jingim jong i Late Daniel R. Kurbah na u Bah Ulrich Warjri.
Ha kane ka lympung ïalehkai Basketball ka Dong Kjatshnong ka la ïohrah ïa ka nam lahduh ha ka liang ki kynthei, hadien ba ki la lah ban pynliem noh ïaka Dong Pdengshnong da 40 la 12 basket ha ka jingïakhun ïa ka final.
Katba ha ka liang ki Shynrang pat ïa ka nam lahduh la ïohrah da ka Dong Massar, kaba lah ban pynliem noh ïaka Dong Khliehshnong da 49 la 36 basket ha ka jingïakhun phainal.
La ïoh ruh ban sam ïa ki khusnam sha ki nongïalehkai ba kynsai tam lane Most Valuable Player, ha kaba ka Aveley Warjri (Dong Kjatshnong) ka la jop ïa kane ka khusnam ha ka liang ki kynthei katba u Baniaineh Nongkhlaw (Dong Massar) u la jop ha ka liang ki shynrang.
