Mawkyrwat, Nohprah 18: Ka Mawkyrwat District Sports Association (MDSA) mynta ka sngi 18 tarik u Nohprah, 2024 ka la ïoh ban pynhap pyrda noh ïa ka lympung ïalehkai kynjatbol kaba la tip kum ka 2nd, 3rd bad ka 4th Division Football League 2024 ba la pynlong hapoh madan Artificial Turf, Nonglang, South West Khasi Hills District.
Kumta, ha ka 2nd Division ka Mawthanrew Youth Sports Club ka la long ka lah duh, ha ka 3rd Division dei ka Rangmaw Sports Club bad ha ka 4th Division dei ka Pyndensynïa Sports & Cultural Club.
Haba phai ha ka jingïalehkai jong ka 2nd Division ka Mawthanrew Youth Sports Club ka la jop noh da 3 – 1 kol lyngba ki kol ba la thep da u Banteiskhem Iawphniaw ha ka minit 30, na u Kliwaster Lyngkhoi (OG) ha ka minit ba 34, bad na u Gilbert Snaitang ha ka minit kaba 70+6 minit, katba ka Mawthong Sports & Cultural Club Organization ka la ïoh ban thep shi kol na u Eveningstar Wanniang ha ka minit kaba 69.
Haba phai ha ka jingïalehkai kaba dei ha ka 3rd Division pat ïa ka nam jop la rah da ka Rangmaw Sports Club lyngba da 2 – 0 kol pyrshah ïa ka Pyndenmawramhah Sports Club bad ba la thep ïa ki kol na u Robinstar Lyngdoh ha kaba minit 1 bad na u Reberstar Nongsiej ha ka minit ba 68.
Ha ka jingïalehkai jong ka 4th Division, ïa ka nam jop la rah da ka Pyndensynïa Sports & Cultural Club da 2 – 1 kol pyrshah ïa ka Pynden Umjaraiñ Sports & Cultural Club bad ïa ki kol jong ka Pyndensynïa S&CC la thep ha ka minit ba 3 bad ba 59 na u Elbenefison Thongni.
Na ka liang ka MDSA ha kane ka kynti ba mynta ka la ïoh ban pynkiew kyrdan ïa ki kynhun ïalehkai kata na ka 4th sha ka 3rd Division ki long ka Pyndensynïa S&CC, ka Pynden Umjaraiñ S&CC, Banangroi FC, bad ka Nongnam SC.
Na ka 3rd sha ka 2nd Division ki long ka Rangmaw SC, Pynmawramhah SC, Rangblang A S&CC, bad ka Mawpyllun YC, katba na ka 2nd sha ka 1st Division ki long ka Mawthangrew YSC bad ka Mawthong SCCO
Ha kane ka sngi la donlang u bah Renikton Lyngdoh Tongkhar, MLA ka Mawkyrwat Constituency kum u kongsan, u bah E. Tariang, District Social Welfare Officer (DSWO), South West Khasi Hills District kum u symbud kongsan ryngkat ka jingdonlang u bah H.S. Diengdoh, SDO barim jong ka Ranikor Civil Sub Division lem bad ki nongkitkam jong ka Mawkyrwat District Sports Association (MDSA).
