Nongpoh, Nailur 11: Hadien ka jingïaid shaphrang jong ka lympung ïalehkai phutbol bala pynlong da ka Khasi Student Union (KSU) Tyrso Unit haka sngi thohdieng kala pynhap pyrda noh ïaka lympung 1st Tirot Sing Syiem Open to All Football Tournament.
Ïa katei ka lympung la wan ban pynhap pyrda noh da u Samla Biangbor Paliar Vice President ka KSU Sengkmie kum u kongsan, haka jing-donlang u Samla Banjop Maring President ka KSU Eastern Border Area kum u symbud kongsan, ki nongïalam shnong naduh u Bah Hillary Shadap Rangbah Shnong Umtngam, Bah Mathias Mujai Rangbah Shnong Tyrso Nongkhyllep bad kiwei kiwei ki riew rangbah.
Ka jingïakhun phainal ha katei ka sngi kala long hapdeng ka Kdohhati FC pyrshah ïaka Mawlansai FC ha kaba ka jinglehkai ka long kaba itynnad bad ïakhaid bha bad hapdeng ka jingïakhun kaba jur ka Kdohhati FC kala lah ban pynliem noh ïaka Mawlasnai FC da 1-0 kol ban rah syndon ïaka nam lahduh jong katei ka lympung.
Naka liang ka KSU kala sam ruh ïaki khusnam sha ka kynhun lahduh bad kumjuh ruh kaba rem ha kaba ka Kdohhati FC kala ioh ban khur ïaka song pisa kaba T.20 hajar lem bad ka trophy katba ka Mawlasnai FC kala ioh ban khur ïaka song pisa kaba T.10 hajar lem bad ka trophy. La sam ruh ïaki khusnam shimet ha kaba ka ïaka nam Best Goal Keeper la rah da u Samla Armebanshan Kharlukhi na Kdohhati FC, ïaka nam Best Player la ioh da u Samla Seiborlang Kharlukhi naka Kdohhati FC bad ïaka nam Top Scorer la rah da u Khawkupar Shadap naka Mawlasnai FC.
U samla Biangbor Paliar Vice President KSU CEC haba ai jingkren ha katei ka sngi u la ai ka jingïaroh ïa ka KSU Tyrso Unit kaba la pyn long ïa katei ka lympung ïalehkai shibynta ban lum ban lang ïa ki samla ha kane ka dong Ri-Bhoi bad u la ong ruh ba kum ka seng ka pynsngew barabor ha ka sorkar ba ka dei ban phai khmat shuwa ïa ki samla trai ri trai muluk ha kaba ïadei bad ki samla ïalehkai sport ha kane ka jylla ym ban wanrah ïa ki briew kiba na bar ha ka jylla namar ka jingduhnong kaba khraw ïa ki samla kiba don bun ki sap ha ki jingïalehkai sport bapher bapher kin ioh lad ban mihkhmat ha ki jingïalehkai bapher bapher ha ka Ri baroh Kawei.
