SHILLONG, Nailar 10: Ka East Khasi Hills District Badminton Association ka la ïoh ban pynhap pyrda noh ïa ka ‘9th East Khasi Hills District Open Badminton Championship 2025’ ha ka 09 tarik Nailar, 2025 jong ka sngi Saitjaiñ. Ka EKHDBA ka la sdang ïa kane ka lympung kaba lai sngi lynter ha ka 07 tarik Nailar bad la pynlong ïa ka ha JN Indoor Stadium Polo, Shillong.
Watla kadei ka lympung kaba lai sngi hynrei la ïohi ïa ka jingïashim bynta jong kiba bun, ha kaba baroh ki nongïalehkai ki don haduh 103 ngut ha ki kyrdan bapher bapher ba la phiah katkum ka rta jong ki.
ïa ki nongïashim bynta shynrang bad kynthei la phiah ha ki kyrdan bapher bapher kiba kynthup naduh: Under-13 ba para marwei (Singles); Under-15 marwei & shijur (Singles & doubles); Under-17 marwei & shijur (Singles & doubles); Under-19 ha ka Single, doubles bad Mixed Double bad nangta ka Seniors (Men & Women) – Single, double bad Mixed Doubles.
Ha kane ka sngi la wan Kongsan da u Dr. C.O Rangad – Senior Vice President jong ka Meghalaya State Badminton Association (MSBA) uba long ruh ha kajuh ka por u Adviser jong ka EKHDBA. La pynïaid ïa ka jingïalang ha ka sngi pynkut da u J.M Sun – Assistant Secretary jong ka EKHDBA uba la pdiang sngewbha ruh ïa u Kongsan, ki nongshah khot sngewbha, ki nongïashim bynta bad baroh kiba la don lang, bad u la pynpaw ruh ïa ka jingsngewnguh ïa baroh kiba la noh synñiang ban pynlong ïa kane ka lympung kaba seisoh.
Ki jingïalehkai Final ki la sdang naduh ka por 10 baje mynstep ter ter ïa kaba la pynbud sa ka jingsam khusnam ha ka por 3 baje nohphai sngi.
Ka jingthmu jong kane ka lympung ka long ban pynshlur ïa ki sap ba thymmai kiba dang mih sha ka jingïalehkai badminton.
Kane ka lympung ka la long kaba jop bha namar ki nongïashim bynta ki la wan bun bha ryngkat ka mynsiem ïakhun. Ka don ka jingong, “ka jingminot ka pynlong ïa u briew uba janai”. Ia kajuh la ïohi ha kiba bun ki nongïalehkai kiba la ïashim bynta ha kane ka lympung. Ka la long ka jingpyni kaba phylla ïa ka sap. Ki la shim ïa ka jingïalehkai bad ki la ai ïa kaba bha tam ha ka por ba ka long kaba kongsan tam.
Ki kyrteng jong ki nongïalehkai kiba la jop bad kiba la wan ba ar ha la ki jong ki kyrdan ha kane ka C’ship ki long:
Ha ka U-13 (Single) na ka liang ki shynrang la jop da u Maywell Pyngrope bud sa u Bikiron Baruah (Runners Up) naki kynthei la jop da ka Lateisha Nongtraw, bud sa ka Anjali Sharma.
Ha ka U-15 Single, na ka liang ki shynrang la jop da u Haegan Diengdoh, bud sa u Owayoomi Toi ha ka kyrdan ba ar, katba ka Inrity Nongtraw ka la jop na ka liang ki kynthei, bud sa ka Lateisha Nongtraw ha ka kyrdan ba ar.
Ha ka jingïakhun ba mar arngut (Boys Doubles) jong ka U-15, la jop da u Maywell Pyngrope & Haegan Diengdoh, nangta u Chanmitre & Owayoomi Toi ki la wan kyrdan ba ar.
Ha ka kyrdan U-17 (Single) na ka liang ki shynrang la jop da u Gavin Kharbuki bud sa u Karlsten Diengdoh ha ka kyrdan ba ar, katba ka Netania T Tariang ka la jop kyrdan ba nyngkong na ka liang ki kynthei, nangta ka Inrity Nongtraw ka la wan ba ar.
U Gavin Kharbuki u la rah ïa ka nam lahduh ha ka kyrdan U-19 (Single) jong ki shynrang bud sa u Raynell Kharbuki ha ka kyrdan ba ar. Katba ha ka liang ki kynthei la rah da ka Pratiksha Joshi bad ka Sneha Chettri ka la wan ba ar.
Katba ha ka jingïakhun ki shijur lane Mixed Double la rah da u Raynell Kharbuki bad ka Pratiksha Joshi, katba u Pratham Majumdar bad ka Sneha Chettri ki la wan kyrdan ba ar.
Ha ka kyrdan ïakhun kiba la heh (Senior) na ka liang ki kynthei la rah da ka Elsarica Umdor, katba ha ka kyrdan ba ar la khur da ka Pratiksha Joshi, u Gaurav Singh u la jop na ka liang ki shynrang, bud sa u Benhanan Kharwanlang ha ka kyrdan ba ar.
Ha ka Women Doubles la jop da ka Elsarica Umdor bad ka Pretty Singh nangta ka Sejjal Joshi bad ka Sheetal Joshi ki la wan ba ar, katba na ka liang ki shynrang la jop da u Kiefer W Shullai bad u Benhanan Kharwanlang, bud sa u Balajied L Nonglait bad u Siddhartha Das ha ka kyrdan ba ar.
Ha ka Mixed Doubles la jop da u Benhanan Kharwanlang ryngkat bad ka Elsarica Umdor, katba u Dwigbijoy Churchung bad ka Christine J CH Momin ki la wan ha ka kyrdan ba ar.