Shillong, Nohprah : Ka Umshing Presbyterian Secondary School, Mawlai Umshing Umjapung ka la pynhap pyrda ïa ka Jubili Rupa jong ka jingïaid lynti kaba 25 snem jong ka ha ka jingïalang kaba la long hapoh ka Hall jong ka skul ha ka sngi Saitjaiñ ba la lah.
Ha kane ka sngi pynkut ïa ka jingrakhe la ia don lang u MLA ka Mawlai u Bah PT Sawkmie kum u kongsan bad u MDC, bah Teiborlang Pathaw kum u symbud kongsan, Rev. L. Nongsiej, President Managing Committee, principal ka skul u Dr. D. Wanswett, ki Pastor, ki Tymmenbasan, ki nonghikai, ki khynnah skul bad kiwei kiwei.
La pyniphuh iphieng ïa ka sngi da ki jingrwai na ki khynnah skul, ki nonghikai, da kaba pule ïa ka ktien U Blei na ki heprit, ka jingshad bad kiwei kiwei.Ha kane ka sngi u MLA ha ka jingdon ryngkat u MDC, u principal, ki nonghikai, ki riew rangbah bad kiwei ki la plie ïa ka kynroh ba la tei na ka MLA Skhim (Special Rural Work Programme) bad ki la pyllait ruh ïa ka Souvenir jong ka jingdap 25 snem jong ka skul.
Haba kren shuwa ban plie ïa ka kynroh u MLA u la pynpaw ba da ka jingisynei u Blei u la ïoh ban plie lai tylli ki kynroh, kawei kane ba mynta ha Umshing Presbyterian, ba ar ha Don Bosco SS ha Nongkohlew bad balai jong ka Balang CNI ha Mawsiatkhnam, kaba u la plie ha ki sngi ba la leit.
Haba kren ha ka prokram rakhe u bah Sawkmie u la pynpaw ka jingkmen ïa ka jingkhot ka skul ban don bynta lang ha ka jingrakhe jong ka.Ula ong ruh ba uei u ban mutdur ba ka skul kan long kumne kumba long mynta na 40 sha 400 ki khynnah skul kin don kiba wan skul ha Umshing Presbyterian, kaba ym don ba poi pyrkhat.
Kum u symbud kong san u bah Teibor ruh u la pynpaw ka jingkmen ba ki kynmaw ia u ba un ïa don bynta lang bad ka jingdap 25 snem jong ka skul.U ong ba u sngewthuh ba ka shlem ai jinghikai ka long kaba donkam bha na ka bynta ban pyrkhat ïa ka lawei ki khynnah jong ka shnong Umshing Umjapung bad kiba marjan.
Nalor kata ula ong ruh ba u sngewthuh ba ka jingïaid lynti kaba 25 snem ka dei kaba eh bha, hynrei haba phai sha u Blei, u ïohi ïa ka jingkyrkhu jong U Blei ka skul ka la kiew, na 40 ngut sha ka 400 ngut bad haba peit ïa ka jingtei la ïohi ïa ka jingkiew jong ka skul.
Hashuwa kane la ïoh ruh ïa ka jingkren na u Dr. D. Wanswett, u Principal ka skul, uba la ïathuh ïa ka history jong ka skul ba la seng ïa ka ha u snem 1997 bad ka jingïaid lynti kam dei kaba suk. “Ha u 1996 ka Balang Kmie na Phudmuri ka la wan ban seng ïa ka lyngkha trei ha kane ka jaka ha Umshing bad ha u 2011 la ïakhun matrik 5 ngut kiba la ïaleh na Phudmuri Presbyterian namar bym pat ithuh ka sorkar ïa ka skul Umshing ha kato ka por bad ki la pass lut.”
U pynpaw ruh ba ka thong jong ka skul ka long ba kin kyntiew ïa ka skul sha ka Higher Secondary, kata ha u 2023 lada kiei kiei baroh kin ïaid beit.
