Shillong, Naitung: Ka Stephen Memorial Secondary School, Mawlai Mawroh hynne ka sngi Balang ka la pynhap pyrda noh ïa ka Creative Week kaba la ai kyrteng ka Talent Week 2022 to unlock your potential hapoh skul ha ka jingdon ryngkat u MLA ka thaiñ u Bah PT Sawkmie kum u kongsan.
Ha kane ka sngi u MLA u la peit ruh ïa ki project bapher bapher ba ki khynnah ki la shna ban pyni ïa ka sap ka phong jong ki ha ka jingsynran u bah John T Lyngdoh kum u symbud kongsan, principal ka skul ka sister C Abraham, ki sister, nonghikai bad kiwei.
U Bah PT Sawkmie haba ai jingkren u la pynpaw ïa ka jingkmen ban don bynta bad ka prokram jong ka skul.U la ïaroh ïa ka skul ha ka ba ïa dei bad ki project kaba ki khynnah ki la shna.U la pynshlur ruh ïa ki khynnah skul ba ki dei ban don ïa ka thong ha ka jingim, uei na kaei kaba ki kwah ban long ha ka jingim ka jong ki.
Kumta haba ia dei bad kane u MLA u la kyntu ïa ki khynnah ban duwai khnang ba U Blei un pyni ïa ki ïa ka jingthmu kaba u don na ka bynta jong ki. Haba kren halor ki nonghikai u pynpaw ka jingpangnud kaba jur bha ban ïohi ïa ki nonghikai ba ki hap ban mih sha surok, ban ïakhih wat ban thiah hapoh surok.
Shuh shuh u ai khublei bad pynpaw ka jingsngewnguh ïa ki skul balang kiba shimkhia ban kyntiew ïa ka pule puthi ha ka jylla.Ha kane ka sngi u la kular ruh ba shen un sa mang ïa ka pisa na ka MLA skhim na ka bynta ki jingdonkam ka skul.
Ka Sister C Abraham principal jong ka skul ha kane ka sngi ka la aiti ïa ka dorkhas na ka bynta ban shna pynbha ka ka Madan basketball jong ka skul, khnang ba ki khynnah kin ioh ban ïalehkai.La pyniphuh iphieng ïa ka sngi da ka jingrwai, jingshad bad jingtem.
Ha kane ka sngi u bah PT Sawkmie u la sam ïa ki khusnam sha kiba jop ha ka ïakop spelling B, debate, Fancy Dress bad kiwei ki jingïakop.
