Nongstoiñ, Risaw, 08: Ka St Xavier s Secondary School New Nongstoiñ, ha ka sngi ba ar jong ka taiew ka la pynkut noh ïa ka jingrakhe dap 25 snem lane Jubili Rupa, naduh ba la seng ïa ka ha u snem 1999.
Ha kane ka sngi la don ryngkat u MLA jong ka Nongstoiñ Bah Gabriel Wahlang kum u kongsan, nangta u MDC ka Mawkyrwat Bah Carnes Sohshang kum u symbud kongsan, u Bishop jong ka Jyllaniam Nongstoiñ u Most Rev, Willbert Marweiñ, u MLA barim Bah Macmillan Byrsat, u Principal jong ka skul u Father Rolandus Lyngdoh, ki heh ophisar jong ka West Khasi Hills, ki nonghikai, ki khynnah skul bad kiwei kiwei kiba la shah khot sngewbha.
Ïa ka jingrakhe la pynlong ha phyllaw jong katei skul ha ryngkat kiba bun jait ki prokram ban pynphuh pynphieng ïa kane ka sngi kyrpang. La ïoh ruh ban sam ïa ki khusnam bapher bapher da u kongsan bad symbud kongsan ryngkat kiwei de ki kynrem ki lyndan.
Ha kane ka sngi kum ka dak ka jingrakhe la ïoh ruh ban thang ïa ka sharak, da ka jingïashimbynta da ki kongsan bad pyllait paidbah ruh ïa ka Souvenir jong ka jingdap 25 snem jong ka skul lyngba u kongsan. Kumjuh ruh kum ka dak ka jingpynhap pyrda ïa ka jingrakhe ïa u mawmer ba 25 snem, u kongsan u la ïoh ruh ban pynhiar noh ïa ka lama jong ka skul.
Na ka liang u Kongsan u la pynpaw ka jingsngew sarong ba kane ka skul ka la jam sha une u mawmer jong ka jingïaid lynti. U la ong ba lehse hapdeng kiba bun ki jingpyrshang jong ka skul ban tbeh ïa ka sharak jingshai ha ka pule puthi, ka la hap ban mad ruh ki jingeh. Hynrei, haba poi ha une u mawmer ka jingdap 25 snem, ka burom ka long sha baroh kito kiba la shim bynta ban prat lynti bad pynlong ïa kane ka skul kumba ka long mynta.
Haba phai sha ki heprit kiba dei ki khynnah jong kane ka skul, u kongsan u la ong, “Ïaid shakhmat ha ka jingpule jong phi ryngkat ka thong kaba skhem, ym ban ïaid ha kino kino ki jingartatien. Ki don ki kmie ki kpa bad ki nonghikai, ki ban tyngshaiñ ïa phi ha ka lynti ba phi dei ban ïaid, ryngkat ka jingieit bad jingshaniah ha u Blei, ba un ai ha phi ïa ka mynsiem ba phin ïoh beit ïa u soh ka jingjop”.
“Ai ba kane ka skul kaba shakri bad ai jingstad kyrpang ïa kito kiba duna ha ka ïoh ka kot, kan nang kiew shaphrang ha ki jingpyrshang jong ka bad ngeit skhem ba kan nang lah ban ai ka jingshakri kaba khambha shuh shuh ha ki por ki snem ki ban nang wan”, ong u MLA Bah Gabriel Wahlang.
