Pynhap pyrda ka Seven Sister HSSM ïa ka Annual School Sports Meet 2026, lahduh ka Yellow House

Mawkyrwat, Ïaïong 10, 2026: Ka Seven Sister Higher Secondary School Mawmitbah, South West Khasi Hills District ka la ïoh ban pynhap pyrda noh ïa ka lympung ïalehkai jong ki khynnah skul kaba tip kum ka Annual School Sports Meet 2026 ha madan Mawsaw, South West Khasi Hills District.
Lah ban kdew ba ha kaba kut jong ki jingïalehkai, la ïoh ban sam ïa khusnam sha baroh ki nongjop ha ki jait jingïalehkai bapher bapher ha kaba ka Blue House ka la rah nam kum ka Best Discipline, ka Yellow House kum ka Best Decoration bad kumjuh ruh ïa ka Best March Past.
Ym tangkata, la sam ruh ki khusnam kum nongmareh ba tbit kata kum ki Best Athletes jong ki Senior Girls ka leit sha ka Aishalin Sangriang jong ka Green House bad jong ki Senior Boy ka leit sha u Apkyrmenskhem Sangriang jong ka Red House.
Ïa ka namlah duh ha kane ka Annual School Sports Meet 2026 jong ka Seven Sister Higher Secondary School Mawmitbah la rah da ka Yellow House.
Lah ban pynkynmaw ba ïa kane ka Annual School Sports Meet 2026 jong ka Seven Sister Higher Secondary School Mawmitbah la wan ban plie pyrda da u Bah Banraplang Jyrwa uba dei u Superintendent of Police jong ka South West Khasi Hills District bad la wan ban pynhap pyrda pat da u bah S.K. Budnah uba dei u ophis ba la shongthait jong ka Post Office, Mawkyrwat.
Ki nongkren haba ai jingkren ryngkat ka jingaimynsiem na ka bynta ki khynnah skul ki la ong ba ka jingdonkam jong ka jingïalehkai ne ka sports ha kine ki por kiba mynta ka la long kaba hakhmat eh namar dei lyngba ki kam ïalehkai ha kaba ïarap ruh ban pynkhlaiñ ïa ka met ka phad. Ym tangkata, ki la ai mynsiem ïa ki khynnah skul ba kin long borabor ki khynnah skul trei shitom bad trei minot khnang ba kin lah ban kynjoh sha ka thong ba ki ki la thmu.