Pynhap pyrda ka Seng Samla Pynthorumkhrah Parish ïa ka Jubili Ksiar da ka jingkynduh lang

Shillong, Nohprah 21 : Ka Seng Samla Pynthorumkhrah Parish St. Peter & Paul ka la pynkut ïa ka jingrakhe Jubili Ksiar kaba long ka jingiaid lynti kaba 50 snem da ka jingkynduh lang kaba 12, ha kane ka sngiU Blei, 21 tarik u Nohprah 2025.
Kane ka Jubili Ksiar ka long ka dak jong ka jingïaid lynti ba kongsan jong ka Seng Samla naduh ba la seng ïa ka ha u snem 1975, kaba pynpaw ïa ki phew snem jong ka jingroi, ki jingkylla, ki jingeh bad ka jingkylla jingmut jingpyrkhat jong ki samla lyngba ki pateng bapher bapher naduh ki snem sdang ba dap da ki jingïaleh bad jingïatei haduh ki Samla mynta kiba dang ïai shim bynta ban pyntbit ïa ka seng.
Ha ki snem 1975, 1980 bad 1990, ka Seng Samla ka la sakhi ïa ka jingroi nang kiew lyngba ka jingïadon bynta jong ki samla kiba la nang la stad bad kiba don ka jingïaineh, kiba la ai ka jingshakri ha ka jingïalam bad ka jingïatei hapoh ka Parish bad ka imlang-sahlang hi baroh kawei.
Ka jingpynkut ïa ka Jubili ka la sdang da ka Mass Bakhuid ba la pynïaid da u Bishop ka Jyllaniam Bah Shillong, u Bishop Bernard Laloo, ha jingïasynran lang u Parish Priest, u Sohblei Lawrence L. Nongkseh bad u Sohblei Festus Shadap, Assistant Parish Priest.
Ha ka sneng ka kraw, u Bishop Bernard Laloo u la kyntu ïa ki Samla ban im ha ka jinglongkhuid bad ban long kiba la pynkhreh ïa ka jingïakhun pyrshah ïa u bymman, uba pyrshang ban pynjot ïa ka jingim jong ki Samla. U la khot ruh ïa ki ban ïajan shuh shuh sha u Jisu Khrist bad ban tei ïa ka jingïatylli bad ka jingïalong kawei ha ka jingngeit.
Kum shi bynta jong ka jingrakhe Jubili, ka Seng Samla ryngkat bad ki dkhot barim, ki la pynlong ïa ka jingïalang kyrpang ban pynkup burom ïa ki nongïalam barim. Ha kane ka jingïalang la pyllait paidbah ïa ka Kot Ksiar Kynmaw Tympang, ïa kaba la pyllait da u Bishop Bernard Laloo ha jingïadonlang u Bah AL Hek, MLA ka Pynthorumkhrah .
Na ka liang ka Seng Samla ka la pynkup burom ruh ïa ki nongïalam barim kiba la ai ka jingkyrshan ba radbah ha ka jingïatei ïa ka seng, kynthup ïa ka Kong Uni Mary Kharkongor, kaba la pynwandur ïa ka jingrwai Anthem jong ka Seng Samla, bad u Bah Dominik K. Lanong, uba la pynwandur ïa ka Constitution jong ka Seng Samla.
Ïa ka jingrakhe Jubili la pynkut noh da ka jingpynhap ïa ka lama Jubili da u Sohblei Festus Shadap, Assistant Parish Priest, ha jingïadonlang u Bah A. L. Hek, MLA.
Shwa ïa ka prokram pynkut, la don ruh ka jingpynbyrngia paidbah lyngba ki jingrwai, ki jingshad bad ka skit (theatre) ba la pyni da ki dkhot barim jong ka Seng Samla, kaba la phalang ïa ki sngi sdang jong ka Seng Samla bad kumno la seng bad la ïaid lyngba ki jingeh ha ki snem mynshwa, kaba la pynmih ïa ka jingkynmaw bad ka jingkmen hapdeng ki paidbah.