Pynhap pyrda ka ophis u DSO ïa ka District Level Inter School Subroto Mukherjee Cup FT ha madan Umdihar

Nongpoh, Naitung 04: Hadien ka jingïaid shaphrang jong ka lympung ïalehkai phutbol ki khynnah skul bala tip kum ka District Level Inter School Subroto Mukherjee Cup Football Tournament mynta u snem bala pynlong da ka ophis u District Sports Officer ha Ri-Bhoi District, kaba la sdang naduh ka 27 tarik Jylliew, katei ka lympung kala poi noh sha kaba kut bala pynhap pyrda noh mynta ka 4 tarik Jylliew 2022 ha madan ïalehkai ha Umdihar.
Ïa katei ka lympung la wan ban pynhap pyrda noh mynta ka sngi da u Bah Banteidor Lyngdoh Myntri ka tnad ïalehkai ka jylla kum u kongsan, haka jingdonlang u Bah Mayoral Born Syiem MLA ka Nongpoh, Bah Jason Sawkmie Mawlong MLA ka Umsning, Arpit Upadhay Deputy Commissioner ka Ri-Bhoi, Giri Prasad Superintendent of Police, Bah Boby L Nongbet District Sports Officer ka Ri-Bhoi, Kong Paidolyne L Nonglait DSEO, Bah RB Shadap President ka RBDSA bad kiwei kiwei ki riew rangbah ka dong Ri-Bhoi.
Haba phai sha ka jingïakhun phainal kaba la long mynta ka sngi ha madan ïalehkai ha Umdihar haka kyrdan U-14 ki shynrang ka jingïaleh kala long hapdeng ka Mynken Christian Higher Secondary School pyrshah ïaka Christian Higher Secondary School bad ha katei ka jingïakhun ban ïaknieh ïaka nam lahduh ka Mynken Higher Secondary School kala lah ban pynliem noh ïaka Christian Higher School da 1-0 kol.
Haba phai sha ka jingïakhun haka kyrdan U-17 ki kynthei ka jingïakhun kala long hapdeng ka Sati Raja Memorial Secondary School pyrshah ïaka St. Vianey’s Secondary School bad ha katei ka jingïakhun ka Sati Raja Secondary School kala pynliem noh ïaka St.Vianeys’ Secondary School da 2-0 kol.
Hynrei ka jingïakhun kaba shongshit bad itynnad ha katei ka sngi ka dei jong ki kyrdan U-17 ki shynrang hapdeng ka Umdihar Presbyterian Secondary School pyrshah ïaka Evershine English Secondary School ha kaba naduh basdang ka kylla step haduh ba kut ka kylla miet ki rang ïalehkai kila sei bad pyni ïala ki sap ki phong jong ki ha kaba wat la bun ki jingpyrshang na baroh ar kynhun ban ioh thep kol, hynrei ym don satia ba ioh pynkhih ïaka jar.
Hadien ba ym don ba ioh thep kol wat hadien bala ai ïaka Extra time naka liang ki bor pynïaid kila rai ban pynshut noh da ka Tie-Breaker bad dei ha katei ka jingïashut kol kynthei bala rai ïaka nam rem nam jop ha kaba da ka jingtbit ki rang shut bol, ka Umdihar Secondary School kala lah ban pynliem noh ïaka Evershine English Secondary School da 4-2 kol ban rah syndon kum ka lahduh.
Haba kren ha katei ka jingïalang pynhap pyrda ha katei ka sngi naka liang u Bah Banteidor Lyngdoh kum u kongsan u la u la ai ka jingïaroh ïaka sap kaba ki khynnah ïalehkai ki don kiba la pyni ruh ha katei sngi, hadien 2 snem bala pynsangeh namar ka khlam COVID-19
U la ai ruh ka jingkyntu ïaki khynnah ïalehkai ha katei ka sngi halor ar tylli ki mat, ba kin trei shitom halor ka sap kaba ki don khnang ba kin poi sha ka thong katkum ka sap kaba kidon, hynrei kum ki khynnah skul kim dei pat ban klet ïaka jingpule namar ka dei ka atiar ba kongsan haka jingim bad ba kin ïaid ryngkat ryngkat bad ka jing pule nalor ka sap kaba ki don bad kyntu ruh ïaki ba kin long ki samla kiba tipsngi kiba ïaid haka akor ka burom bad pyndonkam hok ïaka sap kaba ki don.
U la ai ruh ka jingïaroh ïaki rang bad thei ïalehkai ha katei ka sngi halor ka jingtbit bad ka sap kaba ki don bad khmih lynti ruh ba kitei ki kynhun kin dang kiew shaphrang haka kam ïalehkai wat ban mih khmat ïaka jylla haka National Level.
Naka liang ka ophis u DSO kala sam ruh ïaki khusnam ha katei ka sngi sha ka kynhun lahduh bad kumjuh ruh kiba rem da ki Trophy, Medal.
La sam ruh ïaki khusnam shimet ba kynthup ïaka nam Best Goal Keeper haka kyrdan U-14 ki shynrang la rah da u Jamshaphrang Sun naka Mynken Christian Hr. Secondary School, haka kyrdan U-17 ki shynrang la rah da u Charmbor K Sawian naka Evershine Secondary School, bad haka kyrdan U-17 ki kynthei la rah da ka Ribansi Jamu naka Sati Raja Memorial Secondary School.
Ïa ka nam Best Player haka kyrdan U-14 ki shynrang la rah da u Shalinstar Syngkli naka Christian Higher Secondary School, haka kyrdan U-17 ki shynrang la rah da Imanbha Marbaniang naka Umdihar Secondary School bad haka kyrdan U-17 ki kynthei la rah da ka Cordinia Thangkhiew na Sati Raja Memorial Secondary School. Kitei ki kynhun kiba jop ha katei ka lympung kin leit ruh ban mihkhmat ïaka District sha ka State Level ka ban sa long ha nongbah Shillong.