Shillong Nohprah 23 : Ka skul Little Star School, Umkor Pynursla ha ka sngi Ba-ar ka la pynhap pyrda noh ïa ka jingrakhe ïa ka Silver Jubilee ne ka jingïaid lynti kaba la dap 25 snem jong ka skul ha ka jingshakri ïa ka thain ha ka liang ka jingnang jingstad.
Ïa kane ka jingrakhe la wan ban pynhap pyrda da u Symbud Myntri Rangbah ka Jylla, Bah Prestone Tynsong uba la ai ka jingïaroh ïa ka jingnoh synniang jong ki nongseng bad ki nonghikai naduh u snem 2000 ban ai ka jingshakri kaba paka tam ïa ki khun ki kti jong ki nongshong ba kin ïoh ïa ka jingnang jingstad.
Na ka liang u Kongsan u la ai ruh ka jingïaroh ïa ki khynnah skul kiba la pyni ïa ka sap ka phong la ka long ha ki jingrwai bad jingshad bad ula kyntu ïa ki nonghikai bad ïa ki khynnah skul ba kin bteng ban trei shitom khnang ba ka skul ha kawei ka sngi kan poi sha ka kyrdan kaba shajrong.
U Bah Prestone uba long ruh u MLA ka Pynursla Constituency u la pynbna ban ai 8 Lak tyngka ïa ka skul ba kan ïoh ban tei pyndep ïa ka iingskul bad u la ong ruh ba ha u snem ban wan un sa ïashong ban ïakren bad ki bor pynïaid jong ka skul na ka bynta ban kyntiew ïa kane ka skul da kaba pynïoh ïa ki kor Computer ban pyndonkam ha ka jingpule jongki kaba man la ka sngi.
Ha kane ka jingrakhe u Bah Prestone ula pyllait paidbah ïa ka kot sah kynmaw ha ryngkat ka jingdonlang u Bah Rahbok Tynsong, ki nongpynïaid jong ka skul, ki nongïalam shnong bad kiwei kiwei.
