Shillong, Nailar : U MLA ka Mawlai u Bah Process T Sawkmie ha ka sngi Thohdieng ba la lah u la pynhap pyrda ïa ka taïew lehkmen (Week) jong ka Sacred Heart Girls Higher Secondary School, Mawlai Phudmuri.
Ha kane ka sngi u MLA u la sam ruh ïa ki khusnam sha ki nongjop ha ka Jingïakop thoh Poetry, shna Craft bad kiwei ki jingïakob ha ka jingdon ryngkat lang ka Principal Lydia Pala, ki sister, nonghikai bad ki khynnah skul.
Nalor kata ha kane ka sngi ka skul ka la pynlong ruh ïa ka jingïakob shad kaba la pynshongshit ïa ki khynnah ba kin ïoh ban lehkmen lang. La pyniphuh iphieng ruh ïa kane ka sngi da ka jingrwai bad jingshad na ki khynnah skul ba la pynlong ha phylaw jong ka skul.
Na ka liang u Bah PT Sawkmie ha kane ka sngi u la plie ruh ïa ka kamra ba la buh ïa ki syntiew bad ki jingdro ba har rukom ba la shna bad dro da ki khynnah skul.
Haba ai jingkren hashuwa kane bah PT Sawkmie u la pynpaw ka jingsngewkmen ba ka skul ka ïai bteng ban khot sngewbha ïa u bad u la ai khublei ïa ka principal jong ka skul bad kumjuh ïa ka skul baroh kawei ha ka ba ïa dei bad kane.
Shuh shuh u la pynpaw ruh ka jingkmen ba hadien ar snem ba ki la mad jingeh bad bun kiwei ki jingsngewsih namar ka khlam covid hynrei mynta la ïoh pat ban pynlong ïa ki prokram bapher bapher ha ka ba ki khynnah ki la ïoh ban lehkmen sa shisien pat.
