Shillong, Nohprah 22: Ka Seng Samla Pynthorumkhrah Parish, St. Peter & Paul, ka la pynhap pyrda noh ïa ka jingrakhe ïa ka Jubilee ksiar ne Golden Jubilee (50 snem) bad ïa ka 12th Convention.
La ong ba kane ka Jubili Ksiar kadei ka jingïaid lynti jong ka Seng Samla naduh ba lah seng ïa ka ha u snem 1975, kaba pyni ïa ka jingkiew bad jingroi ha kine ki phew snem kiba la leit noh, ka jingwanrah ïa ka jingkylla, ki jingtynjuh bad ka jingïaid shaphrang katkum ka jingïaid ka juk mynta la bun phew snem. Na ka jingsdang ïa ki snem jong ka jingïakhun ïa ki jingeh bad ka nongrim kaba haduh mynta, kaba ki dkhot kila shimkhia ban pynwandur ïa ka seng.
Ha ki snem 1975, 1980 bad 1990, ka Seng Samla ka la sakhi ïa ka jingkiew suki lyngba ka jingwan ïashimbynta ki samla kiba la nang la stad bad kiba don ïa ka jingkitkhlieh ban pynkhlaiñ ïa ka jinglong nongïalam bad ban tei ïa ka seng hapoh jong ka Parish bad ha ka imlang sahlang.
Ha ka sngi pynkut ïa ka jubili la sdang ïa ka prokram da ka Holy Mass kaba la pynïaid da u Most Rev. Bernard Laloo, Bishop synrop jong ka Diocese of Shillong, ha ryngkat ka jingdonlang u Parish Priest u Fr. Lawrence L. Nongkseh bad u Fr. Festus Shadap uba long u Assistant Parish Priest.
U Bishop Bernard Laloo ula kyntu ïa ki samla ba kin im ïa ka jingim kaba khuid bad ban long kiba la pynkhreh bad ula pynkynmaw ïa ki jingïai bteng ban ïakhun ïa ki bor jong ka jingsniew, kiba pyrshang ban pynjot ïa ka jingim jong ki samla bad ula pynshlur ïa ki ba kin heh kin san da kaba ïajan bha bad u trai Jisu Khrist bad ban tei ïa ka jingïatylli bad ka jinglong kawei ha ka jingngeit.
Kum shi bynta jong ka jingrakhe ïa ka jubili, ka Seng Samla ryngkat bad ki dkhot ki barim kila pynlong ïa ka jingïakynduh kaba kyrpang ban ai burom ïa ki nongïalam ki barim.
Ha kane ka jingrakhe la pyllait paidbah ruh ïa ka Golden Jubilee Souvenir da u Bishop Bernard Laloo ha kaba la ïadonlang u MLA ka Pynthorumkhrah Constituency u Bah A.L. Hek.
Ka Seng Samla ka la pynkup burom ruh ïa ki nongïalam ki barim kiba la noh synniang bha ïa ka seng, kynthup lang ïa ka Uni Mary Kharkongor kaba la thaw ïa ka Anthem jong ka Seng Samla bad Bah Dominik K. Lanong, uba la thaw ïa ka Constitution ne riti treikam jong ka seng. Ïa kane ka sngi la pynwai da kaba pynhap ïa ka lama da u Fr. Festus Shadap, Assistant Parish Priest ha ka jingdonlang u Bah AL Hek.
La ong ba hashwa ban pynkut ïa kane ka jingrakhe, la pynlong ruh ïa ka prokram kaba ïadei bad ka kolshor ha kaba la ïoh ïa ki jingrwai, jingshad bad ka jingak drama da ki dkhot ki barim jong ka Seng Samla.
Kane ka drama ka batai shaphang ki sngi kiba nyngkong jong ka Seng Samla, ha kaba kumno kala sdang bad ïa ki jingeh kiba ka mad da ki nongïalam kiba la seng ïa ka, kaba la kit jingmut bha ha kane ka jingrakhe ïa ka jubilee.
