Shillong, Jylliew 02 : U MLA ka BJP na Shillong South ba dei ruh u Myntri ka tnad Arts and Culture ka sorkar Jylla, Bah Sanbor Shullai u la kren da kaba shai ba ka BJP kan kyrshan beit ïa ka sorkar Meghalaya Democratic Alliance haduh kaba kut wat hapdeng bun ki kynrum kynram kiba mih na ki nongïalam BJP.
Haba kren bad ki lad pathai khubor halor katei ka phang, u Bah Sanbor u la ïathuh ruh ba halor ki mat ba la pynpaw da u President ka party Bah Earnest Mawrie shen un sa pynsngew ha u Myntri Rangbah ka jylla.
Katkum ka jingong jong u Bah Sanbor, la ong ruh ba namar ka rai ban weng ïa ka jingkyrshan na ka sorkar MDA kadei beit ka rai jong ki bor bahalor na Delhi, kumta u la ong ba kam don jingmut shuh ban bteng ban ïatai halor katei ka bynta.
Na ka liang u Bah Sanbor u la pynpaw ruh ba ki ai ka jingkyrshan kaba pura ïa ka sorkar jylla bad ba kan neh tad haduh ban da kut syndon ka samoi treikam.
Da kaba pynpaw ïa ka jingshaniah hapoh ka jingïalam jong u Conrad Sangma kum u nongïalam, u Bah Sanbor u l aongruh ba ka sorkar kaba mynta kadei kaba trei na bynta u paidbah bad kaba sngap bad leh ïa kaei kaba ki paidbah ki pynsngew.
Ha kajuh ka por, u la ong ruh ba haba ïadei bad ka rai treilang bad kino kino ki party ha shwa ka elekshon lane hadien ka elekshon, katei ka phang ki shaniah beit ha ka rai jong ka party na Delhi bad na ka jylla hi ki shu bud beit ïa ka jingbthah jong ki.
Ha kawei pat ka liang, u Bah Sanbor u la kob ruh ba ka party ka don ka jingkyrmen ba kin jop kham bun shuh shuh lada nujor bad ka samoi ba la dep namar ki la don bun ki kyrtong kiba don jingkyrmen ban jop kiba la wan ban pan tiket.
