Pyneh ki nonghikai ban kynriah wat hadien ba shah byrngem weng da ka bor ne ujor ejahar

By Mawphor Editor On Sep 13, 2022

Shillong, Nailur 12: Ki bor Synshar Districtha ka sngi Balang ki la byrngem ban leh da ka bor ne ban ujor da ka ejahar pyrshah ïa ki nonghikai contract hapoh ka sharti jong ka Meghalaya Govt Lower Primary School Contractual Teachers Association(MGLPSCA) lada kim kynriah na ka jaka ïakhih ba ki pynlong ha khmat ka Secretariat hapoh 30 minit namar ka pynkheiñ ïa ka kyndon 144 CrPC ong u Majistor
Na ka liang u President ka MGLPSCA u Babu Birbor Riangtem u la ong ba da leilei kin ym kynriah na kane ka jaka lada ka sorkar ka leh da ka bor ne kan ai da ka ejahar.
“Ngim dei ki lehnoh ne ki riew bymman lada ka leh da ka bor ai kan leh hynrei ngim kynriah” u la ong
Shuh shuh u la ïathuh ba na ka liang jong u magistrate u la bthah ba kin phah da ka jingthoh sha ka sorkar halor ki mat jingdawa jong ki hynrei u la pynphai nia “naduh kaba ngi sdang ïakhih ki kot kiba ngi la phah kin don shi kali Maruti”
“Ki ïaid nangne wut shi wut ruh kim ïohi, namar ki kyllut ki matlah, lada leit shong noh shawei lei uwei u ksew u miaw ruh um ïohi shuh,” ong kawei ka nonghikai ba shong ïakhih ha katei ka jaka
Ka la ong ruh ba haba ïa baroh ki jait kam dei ban don ïa ka kyrdan pule kaba biang, “khie leit peit pat hangtei ha secretariat jan baroh tang ka matric ruh kim lait bha, phi mut kin nang hi ban thaw aiñ ne ban sngewlem ïa ngi.”
Shuh shuh ka la ong, “Ba ki paidbah kin shai nga kwah ban ïathuh hangne ba ka sorkar ha u 2016 ka la lum ïa ki kyrteng jong ki nonghikai Upper primary baroh bad ka jied ïa kiba ibit ban pynneh, bad ha u 2019 ka lah phah ïa ka shiti sha ki skul Upper Primary baroh kaba tyrwa ïa ki ban thung kam pura noh, hynrei mynta pat ki leh klet noh. Balei ka leh klet wat ïa kaba ka la sdang maitphang bad dei na kane keiñ ka daw ba ngi shong ïakhih hangne ban pynkynmaw ruh ïa ka sorkar.”
Hadien katto katne por ba kine ki nonghikai ki la pyneh na ka liang u Additional Deputy Commissioner u la khot ïakren bad pynsngewthuh ba ki nonghikai ki la pynkheiñ ïa kane ka kyndon 144 CrPC hynrei na ka liang kine ki nonghikai ki la ïathuh ba kin shim biang sa da kawei ka sienjam ban ïakhih ha kaba na ka liang jong ki ki la rai ban leit aiti noh ïa ki syrnot pule kaba ki la ïoh ha ka jingpule jong ki sha u Lamphang ka ïing dorbar thaw aiñ ka jylla namar kim dei shuh kiba dang treikam ha khmat ka sorkar.