Shillong, Nailar 07: Ka jingïalang jong ka kynhun Myntri ha ka sngi Palei ka la rai ban pynkylla ïa ka Meghalaya Excise Rules, da kaba wanrah ruh ïa ki kyndon ha kaba ïadei bad ka country liquor bad ban pynduna ïa ka jingdon ki bonded warehouse na ka 3 sha ka 2.
Haba kren sha ki lad pathai khubor hadien ka jingïalang jong ka kynhun Myntri u Myntri Rangbah u Conrad K Sangma u la ong ba kine ki kyndon ki shah halor ka country liquor, ha kaba kane kan ai lad ruh ïa ki nongshna kiad kiba na jylla ban kyntiew ïa ka jingseng kam bad kan kyntiew ruh ïa ka kam shna kiad na la tynrai.
La ong ruh ba kane ka kyndon kan ïarap ban ailad ïa ki riew shimet bad ki karkhana kiba kwah ban shna kiad na la ri la jong.
“Ha ki por mynshwa kam shym la don ka jingshna kyndon bad ha kane ka kynti kaba mynta ngi la shna bad wanrah ïa ki kyndon haba kin lah ban kyntiew ïa kane ka kam jong ki,” ong u Sangma.
“Suki suki ngin sa ïakren ba kiwei ha kaba ïadei bad kane ka kam ha kaba kan ïarap ruh ïa ki ban kyntiew ïa ki kam la jong ha kaba kane kan ïarap ruh ba kin don kiba lah ban seng kam lajong bad kan kyntiew ïa ki kam jngohkai pyrthei ha ka jylla. Kumta ïa kine baroh la leh ban ailad ïa ki nongsengkam la jong kiba don ka jingthmu ban kyntiew ïa kane ka kam shna kiad na la ri bad dei halor kane ruh ba la wanrah ka jingrai hapoh ka kynhun Myntri ha kane ka sngi,” u la bynrap.
Na ka liang jong u Sangma u la pyntip ba ka kynhun Myntri ka la pynduna ka jingdon jong ki bonded warehouses na ka 3 sha ka 2.
Kine ki 2 kynhun kin wanrah ïa ka jingïoh nong kaba long T. 20 klur ha ka shi snem shalor bad ka jingwan rah kaba ym duna ïa ka T. 20 klur ha ka shisnem.
Ha kajuh ka por kane ka wine policy la pynïar ban kynthup ïa ka rhizome, ginger, bulb roots, floral sources, bad ka ngap kiba lah ban shna hi ha la ka jong ka jylla.
“Kine baroh hadien ba la pynkylla sha ki kiad ba la shna hi ha la jylla kin sa kynthup lang hapoh ka wine policy,” bynrap u Sangma.
