Shillong, Jylliew 11 : Kawei na ki jingkylla ha ka saiñ pyrthei kaba pynkyndit ïa baroh ka long ba ka National Peoples Party (NPP) mynta ka kynti ka la pynduh tiket ïa u MLA jongka uba mynta na ka Raksamgre Constituency bad ai ïa ka tiket ne pynïakhun noh da u MLA ba rim jongka Congress u Limison D Sangma.
ïa kane la pynbna paidbah mynta ka sngi ha Tikrikilla da u Myntri Rangbah hi jongka jylla u Conrad K Sangma uba dei ruh u National President ka NPP.
Kane ka jingleh jongka NPP ka long kum ka jingai jingsneng ïa u Benedic uba dei mynshwa u Chief Executive Member (CEM) jongka Garo Hills Autonomous District Council (GHADC) namar ha ka por ba kynrum kynram ka saiñ pyrthei ha katei ka Council u Benedic ula pan ka jingkyrshan na ki MDC ka Trinamool Congress (TMC) ban ïai neh beit kum u CEM wat lada u khlem jop ha ka jingïakhun ïa katei ka election jied CEM ruh kaba long ha u Kyllalyngkot mynta u snem.
Naduh kham mynshwa na ka liang u Myntri Rangbah ula dep pynpaw ba yn sa ai jingsneng ïa u Benedic kat kum ki kyndon jongka party namar u khlem kohnguh ban hiar na ka shuki CEM kumba la bthah da ka party bad dei na kane ka daw u sa shah pynduh tiket ruh namar u ïeng pyrshah ïa ki jingpynïaid ka party NPP.
U Limison u dei u MLA ba la arsien arwat jongka Congress na Raksamgre bad u dei uba ïajan bha bad u Dr Mukul Sangma hynrei ha kane ka kynti u la iehnoh ïa u Dr Mukul bad leit pynïasoh noh bad u Conrad K Sangma.
U Myntri Rangbah u Conrad Sangma ula pynbna ïa kane ha ka jingïalang paidbah ha Tikrikilla ba u Limison un long u kyrtong ka NPP bad u la pynbna khnang ïa kane ruh hakhmat u MLA ka TMC u Jimmy D Sangma.
U Jimmy uba dei shipara bad u Limison u dei uba ïa phet lang na ka Congress bad u Dr Mukul Sangma hynrei mynta utei u MLA ruh u la khreh ban ïakhun na ka NPP na Tikrikilla Constituency.
