Shillong, Nailur 20 : U MLA ka UDP na Mowkaïaw, Bah Nujorki Sungoh ha ka sngi Balang u la kyrpad ïa ka sorkar jylla ba kadei ban pynduh noh ïa ki personal interview ha ki kam Grade – IV, khnang ban wanrah ïa ka jingkhuid jingsuba ha ka thungkam thungjam.
Haba wanrah ïa kane ha Ïing Dorbar Thawaiñ ka jylla, utei u MLA u la kdew ruh ba wat ka sorkar pdeng ka la dep ban pynduh noh ïa ka personal interview naduh u snem 2016 ha kaba 23 tylli ki jylla bad 8 tylli ki Union Territories ki la pyntreikam ïa katei ka rai.
“Kumta nga kyntu ïa u Myntri Rangbah ba un eksamin ïa kane ka kam bad pyntikna ba ka jylla jongngi kan pynduh noh ïa ka personal interview khnang ba kan ym don shuh ka jingleh shilliang ne jied ïa kiba mon (ha ka thungkam thungjam,” ong u Bah Nujorki.
Hynrei haba jubab halor kane, u Myntri Rangbah, Conrad K Sangma u la ong ba ka sorkar ka dang bishar bniah ïa kane ka rukom thungkam ban wanrah da ka polisi kaba kham biang.
“Ngi dang bishar bniah ïa kane ka rukom thungkam, kumta ngi la wan ha ka rai ba lada ngi kwah ban wanrah ka jingkylla, to ngin leh shisien na bynta baroh da kaba peit ha baroh ki lïang bad wanrah da ka rukom treikam kaba sani bad bniah,” u la ong.
Shuh shuh u la ong ruh ba u Myntri Rangbah barim ka jylla ha u snem 2017 u la thoh sha ka sorkar India ban pyntip ba ka sorkar Jylla kam pat weng ïa ka personal interview.
“Tangba ngi dang bishar bniah halor kane ka bynta, ki don ki jingduh nong bad jingïoh nong ha ka. Dei na kata ka daw ba ka sorkar ka dang bishar bniah shwa ha baroh ki liang khnang ba kan long na bynta baroh bad ba kan lah ban plie ka lad ka lynti kaba kham biang na bynta ki samla ka jylla,” u la bynrap biang.
