Pyndonkam noh da ka ‘Ktien Khasi’ haba kren hapoh ka ïingdorbar thaw-aiñ ka jylla: President KSU-JC

Jowai, Ïaïong 11: U samla Laitphar Synrem uba dei u President ka Khasi Students’ Union (KSU) Jowai Circle haba ai jingkren haka jingïalang pynshai paidbah ha Iawmusiang Jowai, halor ka jingdawa ban pynlong Ktien Sorkar (official language) ïa ka ktien Khasi haka jylla Meghalaya, bala khot pynlong da ka Khasi Authors’ Society (KAS), Shnat Jowai mynta ka sngi Saitjaiñ 11 tarik u Ïaïong, 2026.
Naka liang utei u samla ula kyntu jur ïa ka sorkar jylla ba kan ‘pyndonkam noh da ka ktien Khasi haba kren hapoh ka ïing Dorbar thaw aiñ ka jylla, khnang ban pyneh daw bad ban pyneh rngiew ïa ka ktien Khasi hapoh ka jylla’.
Shuh shuh ula ong lada ngi duh ïa ka ‘kyndew ka shyiap, ka riti dustur bad ka ktien ka thylliej’, ngi la duh ïa ka jaitbynriew!, kumta ula khot ban don ka jingïatyllilang kawei bad ban dawa jur na ka sorkar ban pynrung noh ïa ka Ktien Khasi haka khyrnit kaba Phra jong ka Riti synshar ka Ri India.
“Ngi don shibun ki jait ktien ha manla ki shnong ki thaw jong ka jaitbynriew, hynrei ka ktien Khasi ka long ka ktien kaba lah ban ïa sngewthuh lang da baroh bad la pyndonkam ruh ïa ka ha ki jaka pule’ ong u samla Laitphar.
Haba pynkut ïa ka jingkren ula kyntu ïa ki nongmihkhmat baroh ba kin sangeh noh na ka jingkwah myntoi shimet, ka jingparia jaitbynriew, ne klet ïa ka jaitbynriew. Hynrei to shim ïa ka jingïatylli lang ban leit dawa na ka sorkar India ban pynurlong ïa kane ka jingdawa jong ka jatibynriew, ula kren shai ka KSU ka ai jingkyrshan ba pura ïa ka KSA.