Pyndonkam ka Meghalaya da ki kor na Japan ban pynmih bording na Ganol HEP
Lada donkam ngin bujli ïa ki kor barim ha baroh ki HEP

Shillong, Jylliew 01 :Ka Jylla Meghalaya ha ka sien ba nyngkong eh, kala pyndonkam mynta ïa ki kor ki bor (Technology) jong ka Ri Japan ban pynmih bording na ka Ganol Hydro Eletric Project (HEP) ba don ha West Garo Hills District.
Ïa kane la pyntip da u Symbud Myntri Rangbah ka Jylla ba khmih ïa ka Tnad Bording Bah Prestone Tynsong uba la ïathuh ba kane ka Hydro Project kan sdang ban pynmih noh ïa ka bording na ka Unit -I haba kut jong u bnai Risaw katba ïa ka Unit -II bad III yn sdang pynmih bording ha u bnai Nohprah.
U Symbud Myntri Rangbah ka Jylla u pyntip ba kine ki kor ki bor jong ka Ri Japan ki dei kiba la ai jingmynjur da ka Ministry of Power ka Sorkar Pdeng, hadien ka jingshong bishar ïa ki kor bad ïa ka kompani ba pynmih ba ki dei kiba biang eh.
Haba ïakren bad ki katto katne ki Engineer jong ka Tnad MeECL, kila ïathuh ba kawei ka daw ba pynlong ïa ka Jylla Meghalaya ban kyrduh bording ka dei namar ba baroh ki Hydro Electric Project kiba la don ha Jylla ki dei kiba dang pyndonkam haduh mynta ïa ki kor ki bor bala rim rim bah kiba ka jingpynmih bording bad ka jingpyndonkam ïa ka um ban khyrwait ïa ki turbine kam iahap shuh.
Haba kylli, u Symbud Myntri Rangbah u ïathuh “Ka jingpyndonkam ïa ki kor ki bor na Japan ha ka Ganol Project ka dei namar ba ka project ba dang thymmai hynrei lada ki Technical Expert ki ai jingmut ban bujli lang noh ïa ki kor ki bor jong kiwei ki Hydro Project bala don lypa ha Jylla da ki kor ki bor na Japan, ka Sorkar ka lah ban shong pyrkhat kumno ban leh”.
“Ïa mynta hi kam pat don satia kano kano ka jingai jingmut na ki Technical Expert bad ngim pat lah ruh ban ong lehse kine ki kor ki bor jong ka juk barim ki dei kiba biang ne em” ula bynrap.
U Symbud Myntri Rangbah ka Jylla hynne ka janmiet sngi nyngkong ula ïakynduh ïa ki Chief De-Mission ka Ri Japan u Kawazu Kunihiko, uba la wan sha Jylla ban nang pynskhem ïa ki jingiatreilang bad ka Sorkar Jylla ha kiba bun ki liang.
“Ngi la ïakren bad ki Nongmihkhmat na Ri Japan ba ngin don ïa ki Exchange Programme hapdeng ki Technician bad ki Expert jong ngi bad ka Ri Japan ha kiba bun ki shnat treikam (sector) khnang ba ngin nang lah ban pynjanai shuh shuh ïa kine ki shnat treikam hapoh ka Jylla” ïathuh u Bah Prestone.
Haba kren halor ka jingpynkylla ïa ka rukom treikam (reform) ïa ka Tnad Bording ka Jylla bad ka MeECL, u Symbud Myntri Rangbah ula ïathuh ba kane ka jingpynkylla ïa ka rukom treikam kala wan na ka Ministry of Power ka Sorkar Pdeng, kaba la wanrah ïa ka skhim Revamp Distribution Service System (RDSS) ban pyntreikam ha ka Ri baroh kawei.
Haba kylli halor ka Dam Rehabilitation and Improvement Project (DRIP) kaba la bei tyngka da ka Asian Deve lopment Bank ban pynkhlaiñ ïa ki Dam, ban pynkhuid ïa ki Dam bad kiwei kiwei, u Symbud Myntri Rangbah ula ïathuh “Ka Tnad Bording kala phah mynta ïa ka jingtyrwa sha Delhi bad ka jingpynkhreh ïa ki kot tender kala ïaid shakhmat. Ngi kyrmen ba ha kine ki khyndiat bnai, ngin sa ïoh ban khot tender noh”.
Kat kum ka jingong jong u, ka Jylla Meghalaya kala ïoh haduh T.400 klur tam ka pisa na ka ADB ban pyntrei ïa ka DRIP Project hapoh ka Hydro Electric Project ka Jylla ba kynthup naduh ka Pung Umiam, ka Umtrew bad ka Leshka.