Pyndonkam ka BJP ïa ka ED bad CBI ban ñion ïa kiba pyrshah ïa ka : Dy CM

Shillong, Nailur 5 : U Symbud Myntri Rangbah ka jylla u bah Prestone Tynsong mynta ka Lah Sngi U Blei, u la ther tyngeh ïa ka BJP da kaba u la ong ba ka por ka la dier palat ïa ka BJP ban mih na ka sorkar Meghalaya Democratic Alliance (MDA). Nalor kane u la ther shuh shuh ba ka BJP ka pyndonkam ïa ka Enforcement Directorate (ED) bad Central Bureau of Investigation (CBI) kum ki atiar saiñ pyrthei jongka ban ñion naphang ïa kiba pyrshah ïa ka.
ïa kane u la kyrwit tyngeh kum ka jingpynphai nia ïa kaei kaba u National Vice President ka BJP u Dr Chuba Ao u la kob ba hapoh shibnai ka BJP kan shim ïa ka rai ban weng noh na kane ka sorkar MDA ba la ïalam da ka NPP.
“ Mynta ka la paw shai kumba la kynnoh da ka AAP bad TMC ba ka BJP ka pyndonkam ïa ka ED bad CBI ban long ki atiar jongka ban ñion ïa kiba ïeng pyrshah ïa ka” ong u bah Symbud Myntri Rangbah.
U la ong shuh shuh ba kine ki dei tang kita ki buit sianti saiñ pyrthei jong kita ki heh ka BJP ban shu kob lane ka lah ban dei ma u ( Ao) shimet ruh namar kine ki jingkynnoh ba na ka por sha ka por ïa ka sorkar ka dei tang ka kam poh jongka BJP.
U la ong “ Ka NPP ka pdiang sngewbha ïa kane ka rai jongka BJP ban weng noh na ka sorkar MDA. Namar ka sorkar MDA hapoh ka jingïalam jong u Conrad K Sangma bad ma nga kum u Symbud Myntri Rangbah ka ïeng ha ka nongrim ba lada ka BJP ka kwah ban weng noh ai ka mat weng namar la shu kob baroh shi katta bad ka la dier than ba kin dang don ha ka sorkar”.
U la ong kine ki dei ki buit poh jong ki nongïalam ka BJP ban ïada rapjot ïa lade bad saitkhuid ha khmat ki paidbah. “ Ki BJP ki pyrshang ban da rapjot hakhmat ki paidbah da kaba byrngem ban aiti tohkit sha ka ED bad CBI, hynrei ki paidbah ki tip bad sngewthuh shai ïa ki buit poh kane ka party. Ka rukom ai khubor jong uta u Dr Ao ba hana kin shong kyrkieh ban weng noh na ka sorkar bad hadien kata ban aiti noh ban tohkit da ka ED bad CBI ka paw shai kdar ba kine ki dei ki atiar jongka kiba ka shu khyrwait shabi katba ka mon.
U bah Prestone u la ther da kaba ong “ Ha ka jingshisha nga kwah ban ai jingmut ïa u ban aiti shwa sha ka ED bad CBI ym ban shu mih shwa sa aiti lada phi long khuid ïa lade. Lym kumta balei ban mih shwa sa aiti sha ka ED bad CBI na kata ka daw nga sa ong ba kane ka dei ka buit sianti saiñ pyrthei jongka BJP ban pynthame ïa ki paidbah”.