Nongstoiñ, Naitung, 17: Ka long kaei kaei ka bym lah ban mutdur ba ki heh sorkar jong ka Tourism Department, kiba peit ba khmih ïa ka jingpyntrei ïa u mot ba lai mala ha kliar jong u lum Mawthadraishan, ki la pyndonkam bakla ïa ka kyrteng jong ki nongtei bad ka hima Myrïaw hi baroh kawei.
Ka jingpyndonkam bakla jong ka tnad jngohkai pyrthei ïa u mawkyrteng jong ki nongtei, ka long ba ïa u mot ba la tei da ka hima ha u snem 2017, ha ka por ba u bah Aiborlang Syiem Shangoi u dang long u Acting Syiem jong ka hima Myrïaw, la dep pynpra hadien ba ka sorkar lyngba ka Tourism Department, ka la kwah ban pynitynnad shuh shuh ïa tei u mot bad ka la mang pisa na ka bynta ban pynthymmai biang.
Hadien ba ka tnad jngohkai ka la mang pisa la tei ïa utei u mot bad la pyndep nadong shadong kumba u dei ban long. Kaba lyngngoh ka long ba wat hadien ba la dep ka tnad Tourism kam shym la shna ïa u maw kyrteng, hynrei ka la pynneh da u maw kyrteng jong u mot ba la tei da ka hima u ba ka la dep pynpra.
Halor ka jingbym shna jong ka tnad jngoh kai ïa u maw kyrteng, ki riew rangbah jong ki shnong bapher bapher ryngkat bad ki khatsaw ngut ki ba la don kyrteng ha utei u maw, ki la klumar jingmut halor katei ka jingleh biej jong ka tnad jngohkai jong ka sorkar. Haba ïakren bad u nongthoh khubor, ki la ong ba lada ïa ka jinglut jingsep ha kaba tei ïa utei u mot la bei pisa da ka tnad jngohkai, balei kam thoh da uwei u maw kyrteng?
Lada ïa ka jinglut jingsep ha kaba tei ïa la bei pisa da ka hima balei pat ki paitbah bad ki nongsynshar shnong ki tip. Ha kajuh ka por ki la dawa ba u Syiem ba pura jong ka hima Myrïaw, u dei ban pynshai halor ka jingtei jong ka Tourism ïa utei u mot, khnang ba kan ym pynklumar ïa ki paitbah bad ki riew rangbah ka hima.
