Pyndik ki Pulit Assam bad lehnoh Karbi, dawa Police Outpost ka SRSBA ha Ummat ne Madan Umwang

Shillong, ïaïong, 06: Namar ka jingshah pyndik shaba palat jong ki Khasi kiba shong basah ha ki shnong khappud ha ka thaiñ Block-II, ka Synjuk ki Rangbah Shnong Border Area (SRSBA), Raid Nongtung kaba hap hapoh ka Hima Khyrim ha ka sngi Balang ka la dawa ïa ka Sorkar Meghalaya Democratic Alliance (MDA) ban buh noh ïa ka Police Out Post ha ka shnong Ummat lane ha ka shnong Madan Umwang.
“Ka Sorkar Assam ka la buh ïa ka Border Police Out Post ha ka shnong Sabuda bad ki pulit Assam ki ju long ki nongpynthud ïa ki Khasi na ka por sha ka por khlem kiino kino ki daw. Haduh mynta ngi im hapoh ka jingshah byrngem jong ki lehnoh Karbi kiba ju wan lute pisa jubor ïa ngi bad kiba ju byrngem byrsit,” ong ka Synjuk ha ka dorkhas ba la aiti ha u Symbud Myntri Rangbah ka Jylla u Bah Prestone Tynsong ha ka sngi Balang.
“Ki don ruh ki khep ba ki Khasi ki ju shah thombor ha ki Nepali bad dang shen kumba la jia ha ka shnong Jatalong ha ka 1 tarik u bnai Ïaiong, 2022,” ong ka Synjuk.
Ka Synjuk ka la pynpaw ruh ba ki trai shnong ki long kiba kloi ban ai ei wat ïa ka jaka sha ka Sorkar Meghalaya ban shna ïa ka Police Out Post.
Haba pyntip ba ki khasi ki hap ban siew ïa ka khajna na ki mar rep sha ka Karbi Anglong Autonomous Council (KAAC), ka Synjuk ka la ong, “ngi ki Khasi kiba im ha kine ki jaka ïakajia pud ngi hap ban siew ïa ka khajna kaba heh ba la lum da ka KAAC ha ki san tylli ki khyrdop khrong khajna, ha Mawsladiang, ha Sabuda, ha Pabang Jatalong, ha Umjaknieh bad Umsohphoh/Madan Umwang haba pynkit ïa u synsar bad ïa u sying ban leit die sha ki jaka iew.”
“Ha ka por ba la pynkit ïa u synshar, ngi hap ban siew khajna haduh T. 12, 000 hajar na ka bynta kawei ka kali Mahindra Pick Up Truck, T.300 ka khajna sha ka Council bad T.200 sha ki nongtrei ka tnat Forest ka KAAC. Haba kit ïa u sying, ngi hap ban siew T.150 na ka bynta kawei ka kali Mahindra Pick Up Truck ha ki san tylli ki khyrdop khrong khajana jong ka KAAC,” la ong ka Synjuk.
“Kane ka la ktah ïa ka ïoh ka kot bad ïa ka khih ka kamai jong ngi namarba u synsar bad u sying bad kiwei kiwei ki mar rep ngi shahniah kum ka lad kamai ban pyndap ïa ka ing ka sem,” ong ka Synjuk.
Ka Synjuk ka la dawa ïa ka Sorkar Meghalaya ba ka dei ban pynsangeh noh mardor ïa kane ka jinglum khajna jong ka KAAC ban ban pynsangeh noh mardor ïa ka jingpyntreikam ïa ki skhim ha ki shnong Khasi da ka Sorkar Assam, ban weng noh mardor ïa ki Pulit Assam na ka shnong Umru bad Umlaper bad ban pynsangeh noh mardor ïa ka jingbuh Signboard jong ka Assam kaba ong, “Welcome to Karbi Anglong District.”