Shillong, Lber 27: U Bah Tenny Khongnoh na ka shnong Langkyrdem u la pyndep ha ka kyrdan Grade “A” ha ka jingleit shim bynta ha ka Search and Rescue Course jong ka Nehru Institute of Mountaineering (NIM) kaba la pynlong ha Uttarkashi, Uttarakhand.
Na ka liang ka Meghalaya Sport Climbing and Mountaineering Association (MeSCMA) ka la pynpaw ka jingsngewsarong halor ka jinglah jong u Bah Tenny Khongnoh ban pyndep ha ka kyrdan Grade “A” kaba dei ka jingithuh kaba khraw tam na ka Mountaineering Institutes na bynta ki nongshim bynta kiba lah bha ban leh bha ha ka Training of search and rescue.
Kane ka jinghikai ka la sdang naduh ka 1 tarik haduh ka 21 tarik Lber 2022. Ïa ka jinglut jingsep jong kane ka training course la bei tyngka da ka Directorate of Sports and Youth Affairs, jong ka sorkar jylla.
Ki nongai jinghikai ki donkam ban long kiba khlaiñ ka bor met bor phad, ka jingmut jingpyrkhat kaba nep bad ki dei ban long kiba kloi ban pha ïala ka jong ka jingim. Ïa kane ka jait ai jinghikai la ju pynlong ha ki jaka ba jrong jong u lum Himalaya, kaba pyndonkam da ki tyllai ban kiew lane hiar, ha u thah, ban tip halor ki First Aid, ka jingïasngewthuh jingmut ba kynthup ïa ka jingpyndonkam ïa ki helicopter ban ïoh pyllait kloi ïa kiba mynsaw lane ban lap ïa kiba ïap .
