Nongpoh, Jylliew 20: Kumba 33 ngut ki samla kiba dei ka kynhun ba nyngkong ban shah hikai kumno ban ïada haba don kino kino ki jingjia ba sngewsih bad lyngshop mariang kum ka jingshlei um, jumai bad kiwei kiwei lyngba ka skhim ba la tip kum Upscaling Aapda Mitra kila pyndep pura ïaka jingshah hikai ba 12 sngi lynter kaba la pynlong ha State Institute of Rural Development, Nongsder.
Kane ka prokram ka la sdang naduh ka 6 tarik u Jylliew 2022 haduh ka 18 tarik u Jylliew 2022 ha kaba la pynlong da ka District Disaster Management Authority, Ri Bhoi District bad ki don haduh 33 ngut kita ki Community Volunteers kum ki kynhun ba nyngkong (First Batch) na ki shnong bapher bapher ka Ri Bhoi ki ban ioh ïa ka jinghikai ban pyntbit kumno ban ai jingïada ne ïarap ïa ki paidbah ha ka por ba don kano kano ka jingjia ba sngewsih (Calamities).
Ha katei ka jingpynkut noh ïa katei ka prokram ai jinghikai la wan ruh ban shim bynta da u Arpit Upadhaya Deputy Commissioner ka Ri-Bhoi District, ka kong K Wanñiang DDMO, kong M Kharkongor Consultant DDMA, Bah PH Shylla Divisional Commandant In-charge Homeguards bad kiwei kiwei.
Ka Kong K.Wanniang, kaba dei ka District Disaster Management Officer ka Ri Bhoi ka la ai ka jingkren ban pynshai halor ka jingthmu jong kane ka prokram ai jinghikai ban pynsngewthuh shai kdar ïa kita ki Community Volunteer ba kin don kata ka jingkitkhlieh ban ai jingïarap kyrkieh lada don kano kano ka jingjia ba sngewsih.
Ka la ïathuh ruh ba ki don 5 tylli ki District ha ka jylla ba la shah jied ban pyntreikam ïa kane ka skhim ba la itp kum ka Upscaling Aapda Mitra ha kaba ha Ri Bhoi la jied haduh 100 ngut kita ki Community Volunteer ba kin ioh ïa ka jinghikai shaphang ki lad ki lynti ban ïada ne ai jingïarap kyrkieh haba don ki jingjia ba sngewsih bad ki samla na ka NYK, Home guard, Civil Defence kiba la pyntbit ha kane ka kam kin ai jinghikai sha kita ki Community Volunteer.
Naka liang u Deputy Commissioner ka Ri-Bhoi District, haba kren ha katei ka sngi u la pynkynmaw ïaka jingkhie u jumai haka jylla Gujarat haki snem bala leit noh, bala shim ruh ïaka jingim jong kiba bun ki mynsiem briew bad shibun kiwei kiwei ki jingjia kila jia ha kylleng ki jaka, bad dei na kane kadaw ba ka sorkar kala shim ïaka sienjam ban pynlong da ki prokam ai jinghikai sha ki samla bala pynmih ruh ïaka skhim Aapda Mitra ban long kum ki briew ba nyngkong ban peit ïaka jinglong jingman haki shnong jong ki.
Namarkata, u la kyntu ruh ïa ki khun samla kiba la ioh ïa ka jinghikai ban pyntbit ha kane ka kam ki dei ban pyndonkam hok ïa ki lad jinghikai ba ki la ioh lum, namar ngim lah ban tip ha kano kano ka por kin don ki jingjia ba sngewsih bad lada ngi la long kiba la ioh jinghikai lypa ngin lah ban ïarap shibun ïa ki paidbah ban lait na ka jingjia ba sngewsih ne ki jingma ki jingmynsaw, u la bynrap.
Ha katei ka sngi naka liang ka DDMA kala sam ruh khusnam bad syrnod sha kitei ki samla kiba la pyndep ïaka jinghikai ba 12 sngi
