Mawkyrwat, Jylliew 23 : Ki 50 ngut ki samla na kylleng ki shnong hapoh ka South West Khasi Hills District bad nabar jong ka distrik ki la ïoh ban pyndep ïa ka jingshah hikai ha ka bhah kaba lai ne 3rd Batch ha ki ar tylli ki bynta kata ha ka Electronics bad ka Electrical Appliances Repairing ba la pynlong da ka GCIITs Society, South West Khasi Hills District ha GCIITs Training Centre ha Mawkyrwat.
Lah ban kdew ba ïa kane ka 3rd Batch la plie ha ka 3 tarik u Jylliew, 2025 da u bah V.W. Nongsiej uba dei u Executive Director jong ka GCIITs Society.
Shuh shuh ïa kine ka prokram ne ki jinghikai na ka bynta ki 50 ngut ki samla kiba thmu ban pyyndep ha ka Electronics bad ka Electrical Appliances Repairing, ki dei hapoh ka jong ka skhim Raising & Accelerating MSME Performance (RAMP) ba la bei tyngka da ka World Bank ha kaba ha kane ka GCIITs’ Training Centre, Mawkyrwat, South West Khasi Hills District ki samla ki ban sa shah hikai ne shah pyntbit ki don baroh 50 ngut kata ha ka Electronic Appliance Repairing ki don 25 ngut ki bad ha ka Electrical Appliance Repairing ruh ki don 25 ngut bad ka jingai jinghikai na ka bynta jong ki kan long tang hapoh 15 sngi.
Ïa ka Gracy & Co. Institute of Information Technology ne ka GCIIT Society, Mawkyrwat la sdang ïa ka naduh u 11 tarik u Kyllalyngkot jong u snem 2011 da ka jingthmu ban kyntiew lem ïa ki samla jong ka dong ka thaiñ ha ki kam pyntbit ha ki kam komputar bad ym tang kata haduh kine ki sngi kane ka shlem ai jinghikai ka la ïoh ruh ban ai shibun ki lad jinghikai na ka bynta ki khun samla jong ka dong ka thaiñ Mawkyrwat, South West Khasi Hills District bad kumjuh ruh kiba dei na kiwei ki distrik hapoh jong ka Jylla Meghalaya sa ha kiwei dei ki lad ban kin lah ban ïeng ha la ki jong ki kjat.
Ha kane ka sngi la ïadonlang naduh u Akshat Joshi uba dei na ka RAMP’s Consultant kum u kongsan, u bah G. Lyngdoh, Assistant General Manager jong ka District Commerce & Industries Centres (DCIC), South West Khasi Hills District, u bah V.W. Nongsiej uba dei u Executive Director jong ka GCIITs Society ryngkat ki nongwan shah hikai ne ki trainees.
