Pyndep ki 22 ngut ki pulit ïa ka jingshah pyntbit ha 4th MLP Bn Headquarter Sohpian

Nongstoiñ, Risaw 24: Kumba 17 ngut ki pulit Constable bad 5 ngut ki Follower, ki la shah pynkup burom hadien ba ki la pyndep ïa ka jingshah hikai pyntbit ha ka jaka ai jinghikai jong ka 4th MLP Battalion kaba don ha ka shnong Sohpian West Khasi Hills.
Kine ki samla ki pulit langrut ki dei na ka 9th Batch jong ka 4th Meghalaya Police Battalion Sohpian, kiba la pyndep ïa ka jingshah hikai pyntbit bad hynne ka sngi pat ki la pyndep na ka bynta ka Passing out Parade.
Hadien ba ki la pyndep ïa ka jingshah pyntbit ha kiba bun ki bynta katkum ki kyndon treikam jong ka tnad pulit ka jylla, ki la shah pynbam smai mynta ka sngi ha ka kong C.A. Lyngwa Deputy Inspector General of Police (Training & Arm Force).
Ïa ka jingpynbam smai ïa kitei ki pulit la pynlong ha ka madan jong ka 4th MLP Battalion Headquarter Sohpian, ha ryngkat ka parade ha kaba la ïadonlang da u bah Garod LSN Dykes Deputy Commissioner West Khasi Hills, u Bikram D. Marak Superintendent of Police West Khasi Hills, Commandant jong ka 4th MLP Battalion u R.R Marak, bah H.Kharkongor Dy SP, bah R.Moksha DSP, ki heh pulit na Shillong, kiba haïing hasem jong pulit kiba dang shu dep shah pyntbit bad ki riew rangbah na ka shnong Sohpian.
Ka kong C.A Lyngwa kaba long ka kongsan shuwa ba kan ai jingkren, ka la sam ïa ka khusnam sha ki lai ngut ki pulit kiba wan hakhmat duh ha ki bynta bapher bapher ha ka por ba ki shah hikai.
Ka kong Lyngwa haba ai jingkren ka la ong ba ka jingshah hikai bad pyntbit ha ka kam kam kut tang ha Sohpian. Hynrei ki dang don shibun bah ki bynta ba ki dang hap ban bteng ïa ka jingshah pyntbit kum ki pulit.
Ka la ong ruh ba ka jylla ka don kam haduh katta katta ban pynkhlaiñ ïa ka tnad pulit na ka bynta ban wanrah ïa ka shong suk shong saiñ ha ka jylla baroh kawei ha ki por baroh.