Nongstoiñ, Naitung 01: Ka 4th Meghalaya Police Battalion Headquarter kaba don ha Sohpian, ha ka lah sngi u Blei ka la pynlong ïa ka passing out parade ïa ki arspah khatwei ngut ki pulit kiba la pyndep ïa ka jingshah hikai ha katei ka ktem.
U bah Lakador Syiem Commandant jong katei ka ktem pulit, haba ai jingkren u la ong ruh ba ka kynhun jong kitei ki pulit ki dei kiba la sdang ïa ka jingshah pyntbit naduh u bnai Naitung 2023. Ka jingshah pyntbit jong ki ka long ha kiba bun ki bynta ba jong ka jingtreikam ki pulit kum ka jingpyndonkam ïa ki tiar ïaleh ban ïada ïa ka jylla bad ki paitbah.
Nalor kata u la ong ruh ba kitei ki pulit ki la dep shah hikai ruh ha kaba ïadei bad ki aiñ ki kanun, kum ha kaba pyntreikam ïa ka Crpc, Ipc, POCSO, bad ki aiñ kiba ka sorkar ka dang shu pynmih ban pyntreikam ha baroh kawei ka ri.
Ka kong Idashisha Nongrang Director General of Police jong ka jylla ka la long ka kongsan. Haba ai jingkren kum ka kongsan, ka la ai khublei ïa baroh ki pulit kiba la pyndep ïa ka jingshah hikai. Ka la ong ruh ba ki pulit ki don ka kamram kaba khia na ka bynta ban peit ïa ka shong suk shong saiñ hapoh ka jylla.
Ha kane ka sngi ka DGP ka la sam ru ïa ki syrnod bad pyndeng ïa ki takma sha ki shiphew ngut ki pulit langrut kiba wan hakhmat duh ha ka por ba shah pyntbit ha ki bynta bapher bapher.
Kitei ki shiphew ngut ki dei u RC Dajoplin Nonglang Best trainee in drill Ribhoi DEF, RC O.Dkhar Ribhoi DEF best discipline, RC Ballit T.Sangma South Garo hills DEF, best in turn off, RC Riboklang Lyngdoh Eastern Range Shillong best trainee in fire & emergency service RC Maiphersonroy Hoojon East Jaiñtia hills DEF, best trainee in Physical, RC Prodium Rabha best weapon handling West Jaintia hills DEF, RC Shiningstar Marweiñ Ribhoi DEF best trainees in Endurance, RC Prizer R Marak South Garo hills DEF, RC Kyntiewlang Kharhujon West Garo Hills DEF best trainee in all round Best follower in drill RC Albert Manih South Garo hills DEF.
