Jowai, Nailur 17: Ka Seiñ Raij Mynsoo kumba ju long shi sien shi snem kala pyndep noh ïa ka hynnin ka sngi 16 ïa ka lehñiam Behdieñkhlam Behkymphui jong la sdang naduh ka 11 tarik u Nailur, 2024.
La pyndep ïa ka lehñiam Behdeiñkhlam da ka khun ka Seiñ Raij Mynsoo, ha kaba kila ïa mih sha khmat ban ïashim bynta lang.
Ha kane ka sngi pynkut la wan sakhi lang da u MDC ka JHADC ma Evening Teron kum u kongsan, ha ka jingdonlang u Puramon Kynjing Dalloi Elaka Jowai, ki nongkitkam ka Seiñ Raij Mynsoo nalor kiwe de.
Mynta u snem ka Raij Mynsoo ha shwa ba kin leit ban kñia da u Masi sha duwan kñia Dieñyirngam, la ïoh ban pyndep ïa ka nguh ka dem Blei da u Langdoh kaba ki khot ka than Blai.
La ïathuh ba kane ka jinglehñiam Behdieñkhlam Behkynphui ka dei kawei na ki bynta jong ka jinglehñiam ka Seiñ Raij Mynso ban beh shajngai ïa ka pang ka shitom, ban ïoh jingïada ïa ki jingthung jingthep ban lait na ka jingshah lynshop ki bor mariang, ban wanrah ïa ka bah ka miat, ka koit ka khiah, ka roi ka par bad ban bha ka kamai kajih.
