Pyndep ka Lumparing ha khlieh duh ha ka Group B; rung ka Umrynjah & Lawei SC kum ki kynhun kyrdan ba lai

SHILLONG, Kyllalyngkot 14: Ka Lumparing SC ka la pyndep ha ka kyrdan ba ha khlieh duh ha ka Group-B hadien ka jingïakhaid kaba mar 1-1 kol bad ka PFR FA ha ka jingïalehkai group stage ba khatduh jong ka lympung Shillong Sports Association Women’s Football League 2026 hynne ka sngi Balang ha madan First Ground-SSA Stadium, Polo.
Ka Lumparing ka la pyrkhat ba kan pyndep ïa ki jingïalehkai group stage da kaba jop baroh saw sien lynter ki jingïalehkai hadien ba ka Iaphishisha Marbaniang ka la pynkhihjar ha ka minit kaba 32. Hynrei ka PFR FA ka la kyntait ban shah rem da kaba pynïakhaid ha ka minit pynjlan ba khatduh lyngba ka Phibandamary Nongrum (70+2’).
Ka jingïakhaid ka la pynlong ïa baroh arliang ban ïa ryngkat da 10 point hynrei ka Lumparing ka bat ïa ka kyrdan ba nyngkong da ka jingïapher kol kaba kham bha haba ïanujor bad ka PFR Football Accademy.
Kham hashwa, ka Lawei SC ka la pynthikna ïa ka jaka ha ka Quarter final kum kawei naki kynhun kyrdan ba lai ba kham tbit na ka Group-B hadien ba ka la pynliem noh da 4-1 kol ïa ka Lawsohtun SC.
Ka Lawei SC ka la buh ïalade ha ka jingkyrmen kaba skhem da kaba pynkhihjar lai sien tang ha ka kylla step lyngba ka Lavinia Lyngkhoi (11 & 22’) kaba la thep ar kol, bad na ka Delfinia Syiem (32’), nangta ka Lawsohtun ka la pynphai shi kol lyngba ka Ibasuklin Syiemlieh (34’) hashwa ban jam sha ka por shongthait.
Ka Darisha Ladong (65’) ka la thep ïa ka kol kaba saw bad kaba khatduh na ka bynta ka Lawei SC ha ka kylla miet. Da kane ka jingjop ka Lawei SC ka la pyndep ïa ka group stage da kaba kamai 6 point naki saw tylli ki jingïalehkai ha ka Group-B.
Mynta ka kynti ki don 13 tylli ki kynhun kiba ïa shim bynta ha ka SSA Women’s Football League, ha kaba tang ka kynhun nongjop bad kiba wan kyrdan ba-ar na kawei pa kawei ka Group (A, B, C) bad ar tylli ki kynhun kyrdan ba-lai ba kham kynsai kin ïoh rung sha ka Quarter Final.
Katkum ka jingïoh kamai point, ki don lai tylli ki kynhun kiba ïohrung na ka Group A, ka Laitkor SC ka kynhun kaba bat ïa ka nam lahduh, ka Nongthymmai SC, bad ka Umrynjah SC kum kawei na ki kynhun kyrdan ba lai kiba kham tbit; kumjuh ruh na ka Group-B ki don lai tylli ba kynthup ïa ka Lumparing SC, ka PFR FA, bad ka Lawei SC; lem bad ar tylli ki kynhun na ka Group C ka Rangdajied United FC bad ka New Challenger SC.
ïa ka Quarter Final yn pynlong ha ka 16 bad 17 tarik Kyllalyngkot, nangta baroh ar tylli ki Semi final yn pynlong ha ka 20 tarik, bad yn pynkut ïa ka lympung ha ka 24 tarik Kyllalyngkot-2026 (final).