SHILLONG, Jymmang 26: Ka Adhoc Committee jong ka Indian Olympic Association (IOA) ïa kaba la thaw kyrpang na ka bynta ban jied ïa ki nongkitkam ba thymmai jong ka Tripura Olympic Association ka la lah ban pyndep ïa ka kamram da kaba jied ïa ka Dipa Karmakar ban shimti kum ka President ba thymmai jong katei ka synjuk.
ïa kane la pynbna da ka Returning Officer (RO) bad Assistant Returning Officer (ARO), kiba la pyni ba la pyndep ïa ka jingjied nongkitkam da ka lynti kaba shai bad kaba hok. Ka Dipa Karmakar ka la shah pynbam smai ha ka jingïalang ba la pynlong ha Conference Hall jong ka Shaheed Bhagat Singh Yuba Awas, Khejurbagan, Agartala.
ïa kane ka jingïalang la pynïaid da u Bah John F Kharshiing, Chairman jong ka IOA Adhoc Committee na ka bynta ka Tripura kumjuh ruh uba dei u President jong ka Meghalaya Olympic Association, ha ka jingdonlang u Robert R Royte, President jong ka Mizoram Olympic Association, bad u Bamang Tago, Secretary General jong ka Arunachal Olympic Association.
Nalor ka Dipa Karmakar ka ban shimti ïa ka kam kum ka President ba thymmai, la jied General Secretary ïa u Sujit Roy lem bad kiwei pat ki 13 ngut ki nongkitkam Executive Committee jong ka Tripura Olympic Association (TOA) ha kaba kin shakriïa ka kam na ka bynta ka samoi treikam kaba saw snem naduh 2025 haduh 2029.
Na ka liang jong ka IOA Adhoc Committee jong ka Jylla Tripura ka la ai ka jingïaroh kaba khraw sha ka President, General Secretary, ki Executive Members, bad kiwei pat ki nongkitkam jong ka TOA ba thymmai. Ka IOA ka ngeit ba ha ka jingïalam jong ki, ka jylla Tripura kan ïoh ïa ka rukom pynïaid kaba beit kaba ryntih bad kaba seisoh.
Ha katei ka jingïalang, u Chairman jong ka IOA Adhoc Committee, Tripura, u la pule ïa ka khubor kitbok na ka Dr. P.T. Usha, President jong ka Indian Olympic Association IOA, kaba la ong: “Kane ka dei ka por ba kongsan ban pynpaw ïa ka jingïaroh jong ngi ban kyntiew ïa ka kam ïalehkai, ban pynïohlad, ban ai jingïarap bad ban ai lad ïa baroh, khlem da peit ïa ka rta, ka kynthei ne shynrang, ne ka jinglong jong ki. Kum ki nongpynïaid ka kam ïalehkai ha ka jylla, ka long kaba donkam ban trei lang ban lap ïa ki sap, ban tei ïa ki jaka ïalehkai, bad ban pynneh ïa ka riti ïalehkai kaba bha ha ka kyrdan ba sdang. Ka long ruh kaba donkam ban ïada ïa ka bha ka miat jong ki nongïalehkai. Ki dei ka mynsiem jong ka lawei jong ka kam ïalehkai jong ngi, bad ngi dei ban ai ka jingïarap kaba shai, kaba hok, bad ka jingïarap na ki tnad treikam kiba skhem. Kaba kongsan ka long ba kane ka Committee kan ïalam da ka jingvision, ka jingshisha, bad ka jingkitkhlieh kaba khraw. Ka lawei jong ka kam ïalehkai ha Tripura ka shong ha kane.”
