Jowai, Ïaïong, 15: Ka Northeast Institute of Professional Studies (NeIPS) kaba don ha Mynthong, Jowai mynta ka sngi 15 tarik u Ïaïong, 2025 ka la ïoh ban sam ïa ki syrnod (certificate) sha ki 120 ngut ki samla kiba la pyndep ïa ka jingshah hikai ha ka kam Commis Chef, Cosmetology, Fasion Designer bad ka Mobile Phone Hardware Repairing Technician.
Ïa kane ka jingai hikai la kyrshan jingïarap pisa na ka ophis u Deputy Commissioner, ka West Jaiñtia Hills District lyngba ka Skill Meghalaya.
Haba ai jingkren sha kitei ki samla na ka liang u ma Lambormi Suchen uba dei ruh u Skill Development Officer & Member Secretary District Skill Committee, Jowai, ula ai ka jingkyntu ïa kitei ki samla ba kin bteng ïa ka kam jong ki lyngba ka sap kaba ki la ïoh jinghikai khnang ba kan nym kut shuh.
Ha kajuh ka por u kyntu jur ïa kitei ki samla ba kin sdang ban ïeng hala ki jong ki kjat da kaba leit mih shakhmat ba pan jingïarap na ka sorkar lyngba ka Financial Assistance kaba lah ban ai jingïarap ïa kino kino kiba kwah ban sdang ïa ka kam.
Khnang ban pynsuk ïa kitei ki samla kiba la dep ban shah hikai na ka bynta ki jingmyntoi jong ki hadien, ula kyntu ba kin ai ïa ki phone no jong ki sha kane ka shlem ai jinghikai.
