Shillong, Naiwieng 05: Ka Hynñiewtrep Youths Council ka la rai ban ïaid beit shakhmat na ka bynta ban pynlong ïa ka jingïalang paidbah ha Motphran ha ka 7 tarik u Naiwieng, 2024 hadien ba u Myntri ka Sorkar Jylla uba khmih ïa ka tnat Social Welfare u Bah Paul Lyngdoh u la khot ïakren ïa ki nongïalam jong ka seng ha ka 5 tarik u Naiwieng, 2024 hadien ba kane ka kynhun ka la pynbna ban tur paidbah sha Secretariat na ka bynta ban dawa ïa ka Sorkar ba kan pynurlong ïa ki 7 tylli ki mat jingdawa ban iakhun pyrshah ia ka jingjyllei jong u drok hapoh kane ka jylla Meghalaya.
Ha ka jingïakren bad ki lad pathai khubor u President jong ka HYC u Bah Roy Kupar Synrem u la ïathuh ba ha ka jingïakren bad u Myntri ka tnat Social Welfare u Bah Paul Lyngdoh u la ïathuh ba bun na ki mat jingdawa ka Sorkar ka la kular ban pynurlong hapoh ka Drug Reduction Elimination and Action Mission bad ïathuh ruh ba ka seng kan ap shwa ïa ka rai kaba mih na ka jingïalang banyngkong eh jong ka Drug Reduction Elimination and Action Mission ban sa pynïaid da u Symbud Myntri Rangbah uba khmih ïa ka tnat Kam Pohïing ka Sorkar Jylla u Bah Prestone Tynsong ka ban long ha ka 14 tarik, Naiwieng, 2024.
Shuh shuh na ka liang jong u nongïalam ka HYC u la ong ba ka seng ka la ïohpdiang ïa ka shithi na ki bor pynïaid district ba ka sorkar ka la khot ïa ka jingïalang ïa ka seng ha kaba ïadei bad ki mat jingdawa jong ka seng.
“Ha ka 4 tarik u Risaw ngi la thoh sha ka sorkar bad sha u Myntri ka tnat Social Welfare u Bah Paul Lyngdoh ban pynpaw ha u halor ki 7 tylli ki mat jingdawa jong ka seng bad ha ka jingïalang kaba la long ha ka sngi baar kata ka 5 tarik na ka liang ka sorkar ka la ïathuh ba ka la shim ïa ki sienjam ban pynurlong ïa kiba bun ki jingdawa ba la buh hakhmat da ka seng,” ong u Nongïalam ka seng HYC u Bah Roy Kupar Synrem da kaba ong ba kane ka jingïalang ka la long kaba bha hynrei ha kaba ïadei pat bad ka jingïalang ka ban long ha ka 7 tarik ha Motphran kan ïaid beit.
