Pyndam ka Ïingbishar ïa ka hukum ka sorkar kaba khang ki nonghikai kolej ban shim bynta ha ka elekshon

Shillong, Nohprah 05: Ka Ïing Bishar jong ka Meghalaya High Court ha ka sngi Nyngkong ka la pyndam noh ïa ka hukum ba la pynmih da ka sorkar jylla ha ka 23 tarik Lber 2021 bad kumjuh ki kyndon ka Meghalaya State Education Policy 2018 kaba khang ïa ki nonghikai kolej kiba hikai ha ki Aided Institution ne ki kolej kiba ïoh jingïarap na ka sorkar ba kin ïakhun ïa ka ilekshon ne ban shim bynta ne kitkam ha ki seng saiñ pyrthei, ha ka ka rai bishar bad ka jingpynmih ïa ka hukum da u Justice HS Thangkhiew halor ka jingujor da u Brightstarwell Marbaniang uwei napdeng ki nonghikai kolej jong ka jylla pyrshah ïa katei ka jingpynbna ka sorkar.
Kat kum ka hukum, ka Ïing Bishar Meghalaya High Court ka la ai ïa ka rai bishar halor ka mokotduma Shri Brightstarwell Marbaniang & Ors Vs Stateof Meghalaya ka la pynshong nongrim na kiba bun ki rai bishar jong ka Supreme Court, ki High Court na kiwei pat ki jylla bad ruh na ka Riti Synshar ka ri ka la ong ba kane ka ka jingkhang ka sorkar jylla ïa ki nonghikai ha ki kolej kiba ka ai jingïarap ba kin ïakhun ïa ka ilekshon ne ban shim bynta ne kitkam ha ki seng saiñ pyrthei kat kum ka Clause 7.4.3 ka Meghalaya Education Policy 2018 bad ka hukum ne notification kaba ka pynmih ha ka 23 Lber 2021 ba la pynkylla ïa ka Aided College Employee Rule kaba ong ba “Ki nonghikai ha ki kolej sorkar ne ki skulbah sorkar ne ki kolej ne skulbah kiba ïoh jingkyrshan pisa na ka sorkar la khang ba ki don bynta ha kino kino ki kam saiñ hima sima,” ka Ïing Bishar ka la pyndam noh ïa kane ka hukum namar “ka long ka rai lymmuh” ka la ong.
Ka Ïing Bishar ka kdew ruh ba kat kum ka rai bishar jong ka Guwahati High Court ïa ka mukotduma State of Meghalaya vs Dr BJ Battacharjee kaba la mih ha u snem 2005 ka kdew shai ba ki nonghikai kiba hikai ha ki kolej kiba ka sorkar ka ai jingïarap kim dei satia ki nongtrei jong ka sorkar bad ba ki jingmyntoi kum ka baibam tymmen bad kiwei kiba nongtrei sorkar ki ïoh bad ba ki nonghikai ha ki kolej ba shu ïarap ka sorkar kin ym don hok ban ïoh namar kim dei ki nongtrei jong ka.
Ha ka hukum la ïohi ba u nongïasaid aiñ ba mih khmat ïa u Brightsatarwell Marbaniang u la pyntip ha khmat ka Ïing Bishar ba ki nonghikai kiba hikai ha kine ki kolej kiba ka sorkar ka ïarap kim ïoh tulop satia na ka sorkar hynrei dei ki Governing Body jong ka kolej kiba siew tulop ïa ki nonghikai ym ka sorkar bad kumjuh ka jingthung kam ruh ka sorkar kam don bor namar kim dei ki nongtrei jong ka, namarkata, “ka kam hikai ha ki kolej ba ïoh jingïarap na ka sorkar kim dei kiba hap ha ka thup ‘Office of Profit’ ne kiba bam ar maloi, u la kdew bad ong ruh ba lada ki bteng ban hikai ban ban ïakhun ilekshon kam long be-aiñ namar kim dei ki nongtrei jong ka sorkar jylla ne sorkar pdeng.