Shillong, Nailur 16: UMyntri ka tnad Transport, u Bah Dasakhiat Lamare, u la ong ba ka don ka jingpynbor kaba jur na ka sorkar pdeng ïa ka sorkar jylla ban sdang noh ïa ka lynti rel na Tetelia, Assam sha Byrnihat, hynrei na ka liang ka sorkar jylla kan nym sdang ïa kane namar ba ka don ka jingpyrshah kaba jur na ka jylla.
U Bah Lamare, haba jubab ïa ka jingkylli ba la wanrah da u MLA ka Nongpoh, u Bah Mayralborn Syiem, u la ong ba wat lada ka la don ka jingsorjamin ne ka survey ïa ka jaka kaba jngai kumba 2 kilometer shiteng, hynrei kane ka kam haduh mynta kam pat poi shano shano ruh.
Haba la kylli la ka sorkar jylla kan ïaid beit shakhmat bad kane ka jingpynbor ka sorkar India, u Myntri Rangbah ka jylla, u Conrad Sangma, haba ïarap jubab lang, u la ong ba ka sorkar jylla ruh ka kwah ban don ka lynti rel kaba kit tang ïa ki mar ki mata, khnang ban pynsuk ïa ki ka bah bad ban lait na ka jingwan rung ki trok kitmar, hynrei kan nym sdang satia katba kam pat ïoh ïa ka jingmynjur lang na baroh ki liang.
U Conrad u la ïathuh ba ïa kane la ïakren ha ka por ba wan ka jingpang khlam khnang ban khang lad ïa ki draibar trok kit mar kiba wan nabar jylla ka ban ïada na ka jingpang khlam COVID.
Shuh shuh u Bah Dasakhiat, u la ong ba ka la don ka jingpyrshah na ka liang ki Sengbhalang, ki katto katne ki Rangbah Shnong, ki trai jaka ruh halor ka jingwan ka lynti rel.
“Ngi sngewthuh ba ka jingwan ka rel ka long kaba donkam, hynrei ngin nym leh pat katba ym pat lah ban pynsngewthuh ïa ki jingmyntoi ba kan ai, khamtam ïa kito kiba pyrshah”, la ong u Myntri tnad Transport.
Halor ka jingkylli ba la buh da u MLA Nongpoh, u Myntri u la ïathuh ba ka jingthmu ban wanrah lynti rel ne ka jingsorjamin kaba naduh ki snem kiba ladep, kam donkam satia ban da ïoh NoC na ka District Council.
