Pynbna u Myntri Rangbah : Naduh u 2025 yn sdang noh ka jingpule doktor ha Shillong Medical College

Shillong, Nailar 17 : U Myntri Rangbah ka Jylla, Conrad K Sangma u la pynbna ba naduh u snem ban wan kata ha u snem 2025 kin sdang noh ïa ka jaka pule doktor ha Shillong ba la tip da ka Shillong Medical College.
Ïa kane u Myntri Rangbah u la kren ha ka jingïalang plie paidbah ïa ka Babies’ Critical Care Unit dang shen ha Ganesh Das Hospital, Shillong.
“Ha u snem ban wan, ngi don ka jingkyrmen kaba skhem ba ngin lah ban sdang noh ïa ka Shillong Medical College. Kata hi kadei ka thong kaba donkam bad kaba hakhmat eh jongngi kum ka sorkar jylla. Tangba, ngi donkam ïa ka jingkyrshan kaba khlaiñ naphi (doktor ka hospital) ba phin ailang ka jingïatrei lang khnang ba kane ka thong kan long kaba jop,” u la ong.
Da kaba kdew ba katei ka jaka sumar kaba heh tam ha ka jylla kyrpang ïa ki longkmie bad khunlung, u Myntri Rangbah u la ong ba ka Ganesh Das Hospital kadei kawei na ki bynta jong ka Shillong Medical College.
“Ngi donkam shuh shuh ban pynbiang ïa ki tiar jingsumar hangne kum ha ka Intensive Care Unit (ICU) bad ruh ha ka Operation Theatre (OT) nalor kiwei kiwei khnang ba kan long katkum ka jingdonkam ka Medical College bad katkum ki kyndon ka NMC (National Medical Commission),” bynrap shuh shuh u Myntri Rangbah.
U la ïathuh ruh ba kine ki jingdonkam mynta ki don ha ka jingpynkhreh ban pynurlong bad kumta u ong ba ki donkam ban ai ka burom ïa ka tnad ka Koit ka Khiah kaba la trei borbah ban pyntikna ba naduh u snem ban wan ka kynhun ba nyngkong jong ki samla kin lah ban sdang noh ïa ka jingpule doktor naduh u snem ban wan.
Ha kajuh ka por u la ong, “Ngi don ruh ka jingkyrmen ba lada ym dei ha u snem 2025 hynrei ha u snem 2026 yn lah wat ban sdang noh ïa ka jingpule doktor ha Tura Medical College. Kumta ngi khmih lynti ba ha kine ki shisnem arsnem kin don haduh ar tylli ki Medical College kiban treikam ha ka jylla bad kane hi kan sa long ka jingïarap kaba khraw na bynta ban kyntiew ïa ka koit ka khiah ha ka jylla.”
U Myntri Rangbah u la ïathuh ruh ba nalor kine, ka sorkar jylla ka trei borbah ruh na bynta ban pyntikna ba ki jaka sumar jong ka sorkar kin bit kin biang pura ha baroh kawei ka jylla ym dei eh tang ha ki district hospital ne ki civil hospital.
“Ngi la pyrshang borbah ban pyntikna ba wat ha ki thain nongkyndong ruh kin don ki jaka sumar kiba paka. Kane ka long ban pyntikna ba ki paidbah kin ym donkam shuh ban wan sha ka nongbah ban ïoh ïa ki jingsumar ba malu mala. Kumta na bynta kane ruh la mang ban pynlut bun bha bad katba ngi nang kren katta ka kam ka dang ïaid kynthup ha ki hospital heh ruh.”
Katba na ka lïang ka Myntri ka Koit ka Khiah, Kong Ampareen Lyngdoh ka la ong ba ka sorkar jylla ka dang peit ïa kiba bun ki jingeh baki nongtrei ka koit ka khiah mynta ki kynduh. Ha kajuh ka por ka la kyntu ruh ïa ki doktor na kane ka jylla ba kin wanphai ban trei bad shakri ïa ka jylla ha ki jaka sumar jong ka sorkar na ka bynta ka koit ka khiah jong ki nongshong shnong ka jylla.